Last Update :
15 May 2025
કાન્સ ફિલ્મ ફેસ્ટિવલ 2025 (Cannes 2025) નો બીજો દિવસ હોલીવૂડ સ્ટાર ટોમ ક્રૂઝ અને તેની મચ અવેઈટેડ ફિલ્મ 'મિશન ઈમ્પોસિબલ: ફાઈનલ રેકનિંગ' (Mission Impossible: Final Reckoning) નો રહ્યો. બીજા દિવસે જ્યારે ટોમ ક્રૂઝ કાન્સના રેડ કાર્પેટ પર પહોંચ્યો ત્યારે લોકો ઉત્સાહમાં આવી ગયા હતા. આ પછી, 'મિશન ઈમ્પોસિબલ: ફાઈનલ રેકનિંગ' નું પ્રીમિયર થયું હતું. કાન્સમાં આ ફિલ્મને જબરદસ્ત પ્રતિસાદ મળ્યો હતો. ફિલ્મને સ્ટેન્ડિંગ ઓવેશન મળ્યું અને લોકો લાંબા સમય સુધી ફિલ્મને તાળીઓથી વધાવતા રહ્યા. આ જોઈને ટોમ ક્રૂઝ ઈમોશનલ થઈ ગયો હતો.
GSTVની એપ્લિકેશન ડાઉનલોડ કરો
ટોમ ક્રૂઝે લોકોનો આભાર માન્યો
કાન્સમાં ''મિશન ઈમ્પોસિબલ: ફાઈનલ રેકનિંગ' ને મળેલા પ્રતિસાદથી ફિલ્મની આખી ટીમ અત્યંત ખુશ અને ઈમોશનલ હતી. મિશન ઈમ્પોસિબલ (Mission Impossible) ફ્રેન્ચાઈઝીના છેલ્લા ભાગ સાથે તેને અલવિદા કહેતી વખતે ટોમ ક્રૂઝ ઈમોશનલ થઈ ગયો. ટોમ ક્રુઝે પ્રેક્ષકોનો તેમના જબરદસ્ત સપોર્ટ બદલ આભાર માન્યો. આ પ્રસંગે, હોલીવૂડ સ્ટારે કહ્યું, "આ પ્રતિક્રિયા જ છે જે અમને આ કરવા માટે મજબૂર કરે છે. તમે જ અમને આ કરવા માટે મજબૂર કરો છો. મોટા પડદાનો અનુભવ જ અમને આ કરવા માટે મજબૂર કરે છે."
ડાયરેક્ટર ક્રિસ્ટોફર મેકકવેરીએ પ્રશંસા કરી
ફિલ્મ ડાયરેક્ટર ક્રિસ્ટોફર મેકકવેરીએ કહ્યું, "અહીં આવવા અને અમને સપોર્ટ કરવા બદલ આપ સૌનો આભાર. હું આ અસાધારણ અને અદ્ભુત કલાકારોનો આભાર માનવા માંગુ છું. જ્યારે હું તમને કહું છું કે તેઓ કેટલા અસાધારણ છે, ત્યારે તે ફક્ત દરરોજ કામ પર આવવા બદલ નહતું. આ ફિલ્મ મહામારી અને બે ઉદ્યોગ હડતાળ દરમિયાન બનાવવામાં આવી હતી. આ બંને ફિલ્મો સાત વર્ષના સમયગાળામાં ભારે મુશ્કેલીઓ વચ્ચે બનાવવામાં આવી હતી. અહીં ઉભા રહેલા આ બધા લોકોની મહેનત વિના આ ફિલ્મ શક્ય ન હોત. આ દુનિયાની સૌથી અસાધારણ કાસ્ટ છે." ફિલ્મના પ્રીમિયર દરમિયાન ફિલ્મની આખી કાસ્ટ જોવા મળી હતી.
આ ફિલ્મ ભારતમાં 17 મેના રોજ રિલીઝ થશે
આ ફિલ્મ ભારતમાં 17 મેના રોજ રિલીઝ થઈ રહી છે, જે વિશ્વભરમાં રિલીઝ થવાના છ દિવસ પહેલા છે. આ ફિલ્મ માટે ટોમે પોતાના સ્ટંટનું લેવલ અપગ્રેડ કર્યું છે. ભારતમાં દર્શકોનો ફિલ્મ પ્રત્યેનો ઉત્સાહનો અંદાજ એ વાત પરથી શકાય છે કે ફિલ્મનું એડવાન્સ બુકિંગ શરૂ થતાં જ માત્ર 24 કલાકમાં 11,000થી વધુ ટિકિટો વેચાઈ ગઈ હતી. અત્યાર સુધીમાં ફિલ્મની કુલ 45 હજાર ટિકિટ વેચાઈ ગઈ છે.
