Last Update :
12 Jul 2025
જ્યારે રવિવારે ઓલ ઈંગ્લેન્ડ ક્લબના સેન્ટર કોર્ટ પર વિમ્બલ્ડન 2025 (Wimbledon 2025) જેન્ટલમેન્સ સિંગલ્સ ફાઈનલ માટે બે દિગ્ગજ ટેનિસ ખેલાડીઓ એકબીજાનો સામનો કરશે, ત્યારે રોમાંચ ચરમસીમાએ હશે. જ્યારે સ્પેનનો કાર્લોસ અલ્કારાઝ સતત ત્રીજી વખત ટાઇટલ જીતવાના ઈરાદા સાથે કોર્ટમાં પ્રવેશ કરશે, તો વિશ્વનો નંબર-1 ખેલાડી યાનિક સિનર પહેલીવાર વિમ્બલ્ડન ટ્રોફી ઉપાડવાના સ્વપ્ન સાથે કોર્ટમાં ઉતરશે. આ ફાઈનલ મેચમાં, એ જ મેચનું પુનરાવર્તન થશે, જે લગભગ પાંચ અઠવાડિયા પહેલા ફ્રેન્ચ ઓપન ફાઈનલમાં થયું હતું. ત્યારે અલ્કારાઝે પહેલા બે સેટ હાર્યા બાદ વાપસી કરીને સિનરને હરાવ્યો હતો. તે મેચમાં, તેણે ત્રણ મેચ પોઈન્ટ પણ બચાવ્યા અને મેચ 5 કલાક અને 29 મિનિટ સુધી ચાલી હતી. ફરક માત્ર એટલો હશે કે તે દિવસે મેચ ક્લે કોર્ટ પર હતી, જ્યારે હવે આ મેચ ગ્રાસ કોર્ટ પર હશે.
GSTVની એપ્લિકેશન ડાઉનલોડ કરો
સેમીફાઈનલમાં બંનેનું જોરદાર પ્રદર્શન
વિમ્બલ્ડન 2025ની પહેલી સેમીફાઈનલમાં, અલ્કારાઝે અમેરિકાના ટેલર ફ્રિટ્ઝને 6-4, 5-7, 6-3, 7-6 (6) થી હરાવીને ફાઈનલમાં સ્થાન મેળવ્યું. આ પછી, બીજી સેમીફાઈનલમાં, સિનરે નોવાક જોકોવિચને સીધા સેટમાં 6-3, 6-3, 6-4થી હરાવીને પ્રથમ વખત વિમ્બલ્ડન ફાઈનલમાં સ્થાન મેળવ્યું.
https://twitter.com/Wimbledon/status/1943730394332852622
અલ્કારાઝ અને સિનર વચ્ચે અત્યાર સુધીનો રેકોર્ડ
બંને ખેલાડીઓ અત્યાર સુધી 12 વખત ટકરાયા છે, જેમાં અલ્કારાઝે 8 મેચ જીતી છે, જ્યારે સિનર 4 વખત સફળ રહ્યો છે. ખાસ વાત એ છે કે અલ્કારાઝે સિનર સામે છેલ્લી પાંચ મેચ જીતી છે. ગ્રાન્ડ સ્લેમ ફાઈનલમાં પણ અલ્કારાઝનો રેકોર્ડ શ્રેષ્ઠ રહ્યો છે. તેણે અત્યાર સુધી પાંચ ફાઈનલ રમી છે અને તે બધી જીતી છે.
છેલ્લી ફાઈનલને યાદ કરતાં, અલ્કારાઝે કહ્યું કે તે તેની અત્યાર સુધીની સૌથી મુશ્કેલ મેચ હતી. તે ઈચ્છે છે કે આ વખતે મેચ આટલી લાંબી ન હોય, પરંતુ જો જરૂર પડે તો તે તેના માટે તૈયાર છે. જ્યારે સિનરે પણ આ મેચ અંગે ઉત્સાહ વ્યક્ત કર્યો હતો. તેણે કહ્યું કે તેને આશા છે કે આ મેચ પણ ફ્રેન્ચ ઓપન જેટલી જ રોમાંચક હશે. જોકે તેનાથી વધુ સારું બનવું મુશ્કેલ છે, પરંતુ તે પોતાનું શ્રેષ્ઠ પ્રદર્શન કરશે.
ક્યારે રમાશે ફાઈનલ?
અલ્કારાઝ અને સિનર વચ્ચેની ફાઈનલ આવતીકાલ એટલે કે 13 જુલાઈના રોજ રમાશે. ટેનિસ ફેન્સ આ ફાઈનલની મેચની આતુરતાથી રાહ જોઈ રહ્યા છે. જ્યારે અલ્કારાઝ ટાઈટલ હેટ્રિકની નજીક છે, ત્યારે સિનર તેની કારકિર્દીની સૌથી મોટી સિદ્ધિ હાંસલ કરવાના ઈરાદા સાથે પ્રવેશ કરશે.
