Last Update :
12 Mar 2025
સ્મૃતિ મંધાનાની આગેવાની હેઠળની RCB ટીમ WPL જીતવાની રેસમાંથી ઘણા સમય પહેલા બહાર થઈ ગઈ હતી, હવે છેલ્લી મેચ જીતીને મુંબઈ ઈન્ડિયન્સને પણ ખરાબ રીતે ફસાવી દીધું હતું. વિમેન્સ પ્રીમિયર લીગની લીગ સ્ટેજની મેચ હવે પૂરી થઈ ગઈ છે અને તેની સાથે જ ત્રણ પ્લેઓફ ટીમો પણ નક્કી થઈ ગઈ છે. RCB ઉપરાંત યુપી વોરિયર્સની ટીમ પણ બહાર થઈ ગઈ છે. હવે, દિલ્હી કેપિટલ્સને WPL ફાઈનલમાં સીધા રમવાની તક મળશે, જ્યારે મુંબઈ ઈન્ડિયન્સ અને ગુજરાત જાયન્ટ્સને એલિમિનેટર મેચરમવી પડશે. આ મેચ જે પણ ટીમ જીતશે તે ફાઈનલમાં જશે.
GSTVની એપ્લિકેશન ડાઉનલોડ કરો
દિલ્હી કેપિટલ્સ ટેબલ ટોપર
WPLના લીગ સ્ટેજના સમાપન પછી, દિલ્હી કેપિટલ્સ પોઈન્ટ્સ ટેબલમાં ટોપ પર છે. દિલ્હીની ટીમે કુલ 8 મેચ રમી અને પાંચમાં જીત મેળવી અને ત્રણમાં હારનો સામનો કરવો પડ્યો. ટીમના દસ પોઈન્ટ છે. જો આપણે બીજી ટીમ વિશે વાત કરીએ, તો મુંબઈ ઈન્ડિયન્સ પણ અત્યાર સુધી રમાયેલી આઠ મેચમાંથી પાંચમાં જીતવામાં સફળ રહી છે અને ત્રણમાં હારનો સામનો કરવો પડ્યો છે. આ ટીમના પણ દસ પોઈન્ટ છે. પરંતુ જ્યારે ટીમોના પોઈન્ટ સમાન હોય છે ત્યારે ટોપરનો નિર્ણય નેટ રન રેટના આધારે લેવામાં આવે છે. જેમાં દિલ્હી કેપિટલ્સની ટીમે મુંબઈને પાછળ છોડ્યું છે.
નેટ રન રેટમાં મુંબઈ દિલ્હીથી પાછળ રહી ગયું
દિલ્હી કેપિટલ્સની નેટ રન રેટ +0.396 છે, જ્યારે મુંબઈની નેટ રન રેટ +0.192 છે. આનો અર્થ એ થયો કે દિલ્હીની ટીમ અહીં આગળ છે, તેથી તેને ટેબલ ટોપર ગણવામાં આવશે. આ પછી, ત્રીજા નંબરે ગુજરાત જાયન્ટ્સની ટીમ છે, જેણે આઠમાંથી ચાર મેચ જીતી છે અને ચારમાં હારનો સામનો કરવો પડ્યો છે. તેની નેટ રન રેટ +0.228 છે. WPLમાં, ટેબલ ટોપર સીધા ફાઈનલમાં જાય છે, જ્યારે બીજા અને ત્રીજા ક્રમે રહેલી ટીમો વચ્ચે એલિમિનેટર રમાય છે. આ રીતે, દિલ્હીની ટીમ હવે ફાઈનલ રમશે, જ્યારે એલિમિનેટર મુંબઈ ઈન્ડિયન્સ અને ગુજરાત જાયન્ટ્સ વચ્ચે થશે.
13 માર્ચે એલિમિનેટર, 15 માર્ચે ચેમ્પિયન જાહેર થશે
એલિમિનેટર મેચ 13 માર્ચે મુંબઈમાં મુંબઈ ઈન્ડિયન્સ અને ગુજરાત જાયન્ટ્સ વચ્ચે રમાશે. આ મેચ જે પણ ટીમ જીતશે તેનો મુકાબલો ફાઈનલમાં દિલ્હી કેપિટલ્સ સામે થશે. ફાઈનલ મેચ પણ મુંબઈમાં રમાશે. જે 15 માર્ચે થશે. અત્યાર સુધીમાં બે WPLમાં, મુંબઈ ઈન્ડિયન્સે પહેલી સિઝનમાં ટાઈટલ જીત્યું છે, જ્યારે RCBએ બીજી સિઝનમાં ટ્રોફી જીતી છે. હવે જોવાનું એ રહે છે કે આ વખતે નવા ચેમ્પિયન મળશે કે જૂની ટીમ ફરીથી વિજેતા બનશે.
