Last Update :
07 Apr 2025
IPL 2025ની 19મી મેચમાં, ગુજરાત ટાઈટન્સની ટીમે સનરાઈઝર્સ હૈદરાબાદને હરાવ્યું હતું. કેપ્ટન શુભમન ગિલની અડધી સદી અને મોહમ્મદ સિરાજની બોલિંગના આધારે ગુજરાતની ટીમ સનરાઈઝર્સ હૈદરાબાદને હરાવવામાં સફળ રહી. આ સાથે ગુજરાતની ટીમે જીતની હેટ્રિક લગાવી છે. બીજી તરફ, હૈદરાબાદની ટીમને સતત ચોથી હારનો સામનો કરવો પડ્યો. આ હૈદરાબાદની ઘરઆંગણે બીજી મોટી હાર છે. પ્રથમ બેટિંગ કરતા હૈદરાબાદ 20 ઓવરમાં 8 વિકેટ ગુમાવીને માત્ર 152 રન જ બનાવી શક્યું હતું. ગુજરાત તરફથી મોહમ્મદ સિરાજે સૌથી વધુ 17 રન આપીને 4 વિકેટ લીધી હતી. આ IPLમાં સિરાજનો બેસ્ટ સ્પેલ હતો. SRHના 152 રનના જવાબમાં, ગુજરાતે 17મી ઓવરમાં માત્ર 3 વિકેટ ગુમાવીને ટાર્ગેટ ચેઝ કરી લીધો. કેપ્ટન ગિલે શાનદાર અડધી સદી ફટકારી અને અણનમ રહ્યો હતો.
GSTVની એપ્લિકેશન ડાઉનલોડ કરો
ગિલ અને સુંદર વચ્ચે મજબૂત પાર્ટનરશિપ
હૈદરાબાદ દ્વારા નિર્ધારિત 152 રનના સ્કોરને ચેઝ કરતી વખતે ગુજરાતની ઈનિંગની શરૂઆત ખૂબ જ ખરાબ રહી હતી. સાઈ સુદર્શન 5 રન બનાવીને ત્રીજી ઓવરમાં આઉટ થઈ ગયો. બાદમાં, જોસ બટલર પણ ચોથી ઓવરમાં ખાતું ખોલાવ્યા વગર આઉટ થઈ ગયો. આ દરમિયાન, કેપ્ટન શુભમન ગિલ એક છેડે ઉભો રહ્યો અને વોશિંગ્ટન સુંદર સાથે મળીને 13 ઓવરમાં ટીમનો સ્કોર 100 રનથી આગળ લઈ ગયો. આ જ ઓવરમાં, ગિલ 36 બોલમાં પોતાની અડધી સદી પૂર્ણ કરવામાં સફળ રહ્યો હતો. તેના પછીની ઓવરમાં, વોશિંગ્ટન સુંદર પાસે તેની અડધી સદી પૂર્ણ કરવાની તક હતી પરંતુ શમીએ તેને પહેલા જ બોલ પર આઉટ કરી દીધો. સુંદર પોતાની અડધી સદી એક રનથી ચૂકી ગયો. તેણે 29 બોલમાં 5 ચોગ્ગા અને 2 છગ્ગાની મદદથી 49 રનની ઈનિંગ રમી હતી. ગિલ અને સુંદર વચ્ચે ત્રીજી વિકેટ માટે 90 રનની પાર્ટનરશિપ થઈ હતી.
શુભમન ગિલે કપ્તાની ઈનિંગ રમી
સુંદર પવેલિયન પરત ફર્યા પછી, શેરફેન રધરફોર્ડ કેપ્ટન ગિલને ટેકો આપવા આવ્યા અને 15મી ઓવરમાં ચોગ્ગાનો વરસાદ કર્યો. અભિષેક શર્માની આ ઓવરમાં રધરફોર્ડે 4 ચોગ્ગા ફટકારીને કુલ 18 રન બનાવ્યા. આ પછી, 17મી ઓવરના ચોથા બોલ પર, ગિલે એક સિંગલ લીધો અને તેની ટીમને 7 વિકેટથી મોટી જીત અપાવી. આ સાથે ગુજરાતે સનરાઈઝર્સ સામે સતત ચોથી જીત નોંધાવી. કેપ્ટન ગિલે 43 બોલમાં અણનમ 61 રન બનાવ્યા હતા. તેણે પોતાની ઈનિંગમાં 9 ચોગ્ગા ફટકાર્યા હતા. રધરફોર્ડે 16 બોલમાં 35 રન બનાવ્યા અને અણનમ રહ્યો હતો. તેણે પોતાની ઈનિંગમાં 6 ચોગ્ગા અને 1 છગ્ગો ફટકાર્યો હતો.
