Last Update :
22 Apr 2025
સોમવારે IPL 2025ની 39મી મેચમાં ગુજરાત ટાઈટન્સ (GT) કોલકાતા નાઈટ રાઈડર્સ (KKR) ને 39 રનથી હરાવ્યું હતું. ઈડન ગાર્ડન્સ ખાતે રમાયેલી મેચમાં, GT એ પ્રથમ બેટિંગ કરતા 20 ઓવરમાં ત્રણ વિકેટ ગુમાવીને 198 રન બનાવ્યા હતા. જવાબમાં, KKRની ટીમ 20 ઓવરમાં 8 વિકેટ ગુમાવીને 159 રન જ બનાવી શકી.
GSTVની એપ્લિકેશન ડાઉનલોડ કરો
આ સાથે, GT એ IPL 2025ના પોઈન્ટ્સ ટેબલ પર પોતાનું ટોચનું સ્થાન વધુ જાળવી રાખ્યું છે. શુભમન ગિલની આગેવાની હેઠળની GT માટે આ 8 મેચમાં છઠ્ઠી જીત હતી અને તે નંબર-1 પર યથાવત છે. જ્યારે અજિંક્ય રહાણેની KKRની 8 મેચમાં આ પાંચમી હાર હતી અને તે પોઈન્ટ્સ ટેબલમાં 7મા સ્થાને છે.
તમને જણાવી દઈએ કે IPL 2025ના પોઈન્ટ્સ ટેબલમાં, દિલ્હી કેપિટલ્સ (DC) ગુજરાત (GT)પછી બીજા સ્થાને છે. દિલ્હીએ 7માંથી 5 મેચ જીતી છે. રજત પાટીદારની આગેવાની હેઠળની RCB ત્રીજા સ્થાને છે. PBKS અને LSG અનુક્રમે ચોથા અને પાંચમા સ્થાને છે.
ઓરેન્જ કેપ કોની પાસે છે?
GTનો ઓપનર સાઈ સુદર્શન IPL 2025માં સૌથી વધુ રન બનાવવાના મામલે નંબર-1 પર છે. સુદર્શને સોમવારે KKR સામે 52 રનની શાનદાર ઈનિંગ રમી અને ઓરેન્જ કેપ પોતાના નામે કરી છે. લેફટી બેટ્સમેને વર્તમાન સિઝનમાં અત્યાર સુધીમાં 8 મેચમાં 5 અડધી સદીની મદદથી 417 રન બનાવ્યા છે. તેની એવરેજ 52.13 અને સ્ટ્રાઇક રેટ 152.18 છે.
LSGનો નિકોલસ પૂરન 368 રન સાથે બીજા સ્થાને છે. GTનો જોસ બટલર 356 રન સાથે ત્રીજા સ્થાને છે. MIનો સૂર્યકુમાર યાદવ (333) અને RCBનો વિરાટ કોહલી (322) અનુક્રમે ચોથા અને પાંચમા સ્થાને છે.
પર્પલ કેપ કોની પાસે છે?
IPL 2025માં સૌથી વધુ વિકેટ લેવાની રેસમાં GTનો ફાસ્ટ બોલર પ્રસિદ્ધ કૃષ્ણા નંબર-1 પર છે. કૃષ્ણાએ 8 મેચમાં 16 વિકેટ લીધી હતી. DCનો કુલદીપ યાદવ 7 મેચમાં 12 વિકેટ સાથે બીજા સ્થાને છે.
CSKનો નૂર અહેમદ 8 મેચમાં 12 વિકેટ સાથે ત્રીજા સ્થાને છે. GTનો લેફ્ટ આર્મ સ્પિનર સાઈ કિશોર 8 મેચમાં 12 વિકેટ સાથે ચોથા સ્થાને છે. RCBનો જોશ હેઝલવુડ 8 મેચમાં 12 વિકેટ સાથે પાંચમા ક્રમે છે.
દરેક વિભાગમાં આગળ છે ગુજરાત
ગુજરાત ટાઈટન્સ (GT) એ પોઈન્ટ્સ ટેબલ તેમજ ઓરેન્જ અને પર્પલ કેપ પર પ્રભુત્વ જાળવી રાખ્યું છે. ગુજરાત આગામી મેચોમાં મજબૂત પ્રદર્શન કરીને પ્લેઓફ માટે ક્વોલિફાય થનારી પ્રથમ ટીમ બનવાનો પ્રયાસ કરશે. KKR હજુ પ્લેઓફની રેસમાંથી બહાર નથી થયું અને તેને જીતના ટ્રેક પર પાછા ફરવા માટે કોઈ ચમત્કાર કરવો પડશે.
