Last Update :
31 May 2025
શુક્રવારે IPL 2025ની એલિમિનેટર મેચમાં, મુંબઈ ઈન્ડિયન્સ (MI) એ ગુજરાત ટાઈટન્સ (GT) ને હરાવીને ક્વોલિફાયર-2માં પોતાનું સ્થાન નિશ્ચિત કર્યું છે. આ હાર સાથે, GTની સફર સમાપ્ત થઈ ગઈ છે. MI એ GTને જીતવા માટે 229 રનનો ટાર્ગેટ આપ્યો હતો. જોકે, GTની ટીમ આ ટાર્ગેટ ચેઝ કરવામાં અસફળ રહી અને 20 રને મેચ હારી ગઈ.
GSTVની એપ્લિકેશન ડાઉનલોડ કરો
ટાર્ગેટ ચેઝ કરતા, GTની શરૂઆત ખરાબ રહી હતી. કેપ્ટન શુભમન ગિલ 1 રન બનાવીને આઉટ થયો હતો. આ પછી, કુસલ મેન્ડિસ (20) હિટ વિકેટ પર આઉટ થયો. ત્યારબાદ સાઈ સુદર્શન અને વોશિંગ્ટન સુંદરે અડધી સદીની પાર્ટનરશિપ કરીને ટીમને વાપસી કરવાની તક આપી.
બુમરાહે રમત બદલી નાખી
જોકે, બુમરાહે સુંદરને 48ના વ્યક્તિગત સ્કોર પર આઉટ કરીને ટીમને મોટો ઝટકો આપ્યો. સાઈ સુદર્શન પણ 80 રન બનાવીને આઉટ થયો હતો. આ પછી, MI એ GTને વાપસી કરવાની તક ન આપી. GTની ટીમ 20 ઓવરમાં ફક્ત 208 રન જ બનાવી શકી.
આ હાઈ-વોલ્ટેજ મેચની શરૂઆતમાં, રોહિત શર્માએ પોતાની વિસ્ફોટક બેટિંગથી GT સામે MIને મજબૂત સ્થિતિમાં પહોંચાડ્યું હતું. તેણે 50 બોલમાં 9 ચોગ્ગા અને 4 છગ્ગાની મદદથી 81 રન બનાવ્યા અને ટીમને પાંચ વિકેટે 228 રન સુધી પહોંચાડી.
બેયરસ્ટોની વિસ્ફોટક શરૂઆત
બેયરસ્ટોએ 22 બોલમાં 47 રનની ઝડપી ઈનિંગ રમી. જોકે, આ સમય દરમિયાન રોહિત શર્માને બે વાર જીવનદાન મળ્યું, પહેલા પ્રસિદ્ધ કૃષ્ણાના બોલ પર ગેરાલ્ડ કોએત્ઝી અને પછી સિરાજના બોલ પર વિકેટકીપર કુસલ મેન્ડિસે તેનો કેચ છોડી દીધો. મુંબઈએ માત્ર 3.5 ઓવરમાં 50 રન પૂરા કર્યા અને પાવરપ્લેમાં ટીમે કોઈ પણ વિકેટ ગુમાવ્યા વિના 79 રન બનાવ્યા, જે આ સિઝનમાં ટીમનો સૌથી વધુ પાવરપ્લે સ્કોર હતો.
અંતે, કેપ્ટન હાર્દિક પંડ્યાએ 9 બોલમાં ત્રણ છગ્ગાની મદદથી 22 રનની ઝડપી ઈનિંગ રમી અને MI એ 20 ઓવરમાં 5 વિકેટ ગુમાવીને 228 રન બનાવ્યા. GT તરફથી પ્રસિદ્ધ કૃષ્ણાએ 53 રનમાં બે વિકેટ અને સાઈ કિશોરે 42 રનમાં બે વિકેટ લીધી, જ્યારે સિરાજે 37 રનમાં એક વિકેટ લીધી હતી.
