Last Update :
05 May 2025
પંજાબ કિંગ્સના (PBKS) ઓપનર પ્રભસિમરન સિંહની તોફાની ઈનિંગે ધર્મશાલાના ઠંડા વાતાવરણમાં ગરમી લાવી દીધી. જોકે, તે તેના IPL કરિયરની બીજી સદી ચૂકી ગયો. પ્રભસિમરને 48 બોલમાં સાત છગ્ગા અને છ ચોગ્ગાની મદદથી 91 રન બનાવ્યા હતા. પ્રભસિમરનની ઈનિંગે પંજાબ કિંગ્સને IPL 2025ની 54મી મેચમાં લખનૌ સુપર જાયન્ટ્સ (LSG) સામે 236 રન બનાવવામાં મદદ કરી. જવાબમાં LSGની ટીમ ફક્ત 199 રન જ બનાવી શકી. PBKS એ આ મેચ 37 રને જીતી લીધી. આ જીત સાથે PBKSના 15 પોઈન્ટ થઈ ગયા છે અને ટીમ પોઈન્ટ્સ ટેબલમાં બીજા સ્થાને પહોંચી ગઈ છે.
GSTVની એપ્લિકેશન ડાઉનલોડ કરો
પંતનો દાવ ઉલટો પડ્યો
એક દિવસ પહેલા પડેલા વરસાદ અને આકાશમાં વાદળોને ધ્યાનમાં રાખીને, LSGના કેપ્ટન રિષભ પંતે કહ્યું કે તેને ખબર નથી કે વિકેટ કેવી રીતે વર્તશે, તેથી તેણે ટોસ જીતીને પહેલા બોલિંગ કરવાનો નિર્ણય લીધો. આકાશ સિંહને LSGની પ્લેઈંગ ઈલેવનમાં સ્થાન મળ્યું. આકાશે પહેલી જ ઓવરમાં પ્રિયાંશ આર્ય (1) ને આઉટ કર્યો. ત્યારબાદ પ્રભસિમરન અને જોશ ઈંગ્લિસ (30) એ છગ્ગાનો વરસાદ કર્યો. ઈંગ્લિસે બીજી ઓવરમાં મયંક યાદવના બોલ પર સતત ત્રણ છગ્ગા ફટકાર્યા, જ્યારે પ્રભસિમરને ચોથી ઓવરમાં બે છગ્ગા અને એક ચોગ્ગો ફટકાર્યો. બંનેએ બીજી વિકેટ માટે 48 રનની ઝડપી પાર્ટનરશિપ કરી અને ટીમને ખરાબ શરૂઆતથી બચાવી.
પ્રભસિમરન સદી ચૂક્યો
પ્રભસિમરને 30 બોલમાં પોતાની અડધી સદી પૂર્ણ કરી અને સતત ત્રીજી મેચમાં અડધી સદી ફટકારી. આ તેની IPL કરિયરની આઠમી અડધી સદી છે. તે PBKS માટે સતત ત્રણ ઇનિંગ્સમાં અડધી સદી ફટકારનાર ત્રીજો ઓપનિંગ બેટ્સમેન બન્યો. આ પહેલા ફક્ત ક્રિસ ગેલ અને કેએલ રાહુલ જ આ કરી શક્યા હતા. પ્રભસિમરન ત્યાં જ ન અટક્યો, તેણે પોતાનો ધમાકેદાર દેખાવ ચાલુ રાખ્યો અને કેપ્ટન શ્રેયસ સાથે 78 રનની પાર્ટનરશિપ કરી. પ્રભસિમરને આવેશ ખાનની ઓવરમાં બે છગ્ગા અને બે ચોગ્ગા ફટકાર્યા અને સદી તરફ આગળ વધી રહ્યો હતો ત્યારે તેણે દિગ્વેશના બોલ પર રિવર્સ સ્વીપ મારવાનો પ્રયાસ કર્યો અને નિકોલસ પૂરણના હાથે કેચ આઉટ થયો.
જ્યારે પ્રભસિમરન આઉટ થયો ત્યારે તે સદીથી માત્ર 9 રન દૂર હતો. પ્રભસિમરને 91 રન બનાવવા માટે 48 બોલનો સામનો કર્યો હતો. પોતાની ઈનિંગમાં તેણે ચોગ્ગા કરતાં વધુ છગ્ગા ફટકાર્યા હતા. તેણે સાત છગ્ગા અને છ ચોગ્ગા ફટકાર્યા હતા. પ્રભસિમરન ઉપરાંત, PBKSના કેપ્ટન શ્રેયસ અય્યર (45) અને જોશ ઈંગ્લિસ (30) એ પણ તેમના શોટથી દર્શકોનું મનોરંજન કર્યું. નેહલ વાઢેરાએ 9 બોલમાં 16 રનની ઈનિંગ રમી. શશાંક સિંહે 15 બોલમાં 33 રન બનાવ્યા અને માર્કસ સ્ટોઇનિસે 5 બોલમાં 15 રનની અણનમ ઈનિંગ રમી.
મયંક અને આવેશ મોંઘા સાબિત થયા
LSGના ફાસ્ટ બોલિંગ એટેકના બે સૌથી પ્રખ્યાત બોલર મયંક યાદવ અને આવેશ ખાન આ મેચમાં ખૂબ મોંઘા સાબિત થયા. મયંકે તેની ચાર ઓવરમાં 60 રન આપ્યા, જ્યારે આવેશએ 57 રન આપ્યા. બંનેમાંથી કોઈપણ વિકેટ ન મેળવી શક્યું. આકાશ સિંહ અને દિગ્વેશ રાઠીએ 2-2 વિકેટ લીધી હતી.
અર્શદીપ સિંહે રમત બગાડી
237 રન ચેઝ કરવા ઉતરેલી LSGને શરૂઆતમાં જ અર્શદીપ સિંહે બેકફૂટ પર ધકેલી દીધી હતી. LSGએ 27 રનના સ્કોર પર ત્રણ વિકેટ ગુમાવી દીધી હતી અને બધી જ વિકેટ અર્શદીપે લીધી હતી. અર્શદીપે ત્રીજી ઓવરમાં 2 વિકેટ લીધી. અર્શદીપે પહેલા મિશેલ માર્શ (0) ને કેચ કરાવ્યો અને પછી તે જ ઓવરમાં એડન માર્કરામ (13) ને બોલ્ડ કર્યો.
અર્શદીપ ખૂબ જ લયમાં દેખાઈ રહ્યો હતો અને શ્રેયસ અય્યરે તેને ત્રીજી ઓવર પણ આપી. આ ફાસ્ટ બોલર કેપ્ટનની અપેક્ષાઓ પર ખરો ઉતર્યો અને ઈનિંગની પાંચમી ઓવરમાં નિકોલસ પૂરનને LBW આઉટ કર્યો. પૂરણે 5 બોલનો સામનો કર્યો અને 6 રન બનાવ્યા હતા. ચોથા નંબર પર બેટિંગ કરવા આવેલા LSGના કેપ્ટન રિષભ પંત પાસે મોટી ઇનિંગ રમવાની તક હતી. જોકે, તે ફરી એકવાર નિષ્ફળ ગયો. એક શક્તિશાળી શોટ રમવાનો પ્રયાસ કરતી વખતે, તેના હાથમાંથી બેટ સરકી ગયું અને તે કેચ આઉટ થયો. વિકેટકીપર બેટ્સમેને 17 બોલમાં 18 રનની ધીમી ઈનિંગ રમી. પંત 18મી સિઝનમાં ફક્ત 1 અડધી સદી જ ફટકારી શક્યો છે. તેણે CSK સામે 63 રન બનાવ્યા હતા.
સમદ અડધી સદી પૂર્ણ ન કરી શક્યો
ડેવિડ મિલર (11) રન બનાવવા માટે સંઘર્ષ કરી રહ્યો હતો લોઅર મિડલ ઓર્ડરમાં અબ્દુલ સમદે ઝડપથી રન બનાવ્યા પરંતુ માર્કો જેન્સેનના હાથે કોટ એન્ડ બોલ થયો. સમદે 25 બોલનો સામનો કર્યો અને 45 રન બનાવ્યા હતા. LSGની છેલ્લી આશા આયુષ બદોની (74) યુઝવેન્દ્ર ચહલની બોલ પર અર્શદીપ સિંહના હાથે કેચ આઉટ થઈ ગઈ. આવેશ ખાન 19 રને અને પ્રિન્સ યાદવ 1 રને અણનમ રહ્યા હતા.
PBKS માટે અર્શદીપ સિંહે ઈકોનોમિકલ બોલિંગ કરી. તેણે 4 ઓવરમાં માત્ર 16 રન આપીને 3 વિકેટ લીધી. યુઝવેન્દ્ર ચહલ અને વિજય કુમાર મોંઘા સાબિત થયા. ચહલે 4 ઓવરમાં 50 રન આપ્યા જ્યારે વિજય કુમારે 3 ઓવરમાં 49 રન આપ્યા. અઝમતુલ્લાહ ઉમરઝાઈએ 2 વિકેટ અને યાન્સન અને ચહલે 1-1 વિકેટ લીધી.
