Last Update :
26 May 2025
IPL 2025માં, મુંબઈ ઈન્ડિયન્સ (MI) નો અનુભવી બેટ્સમેન રોહિત શર્મા શાનદાર ફોર્મમાં દેખાઈ રહ્યો છે. અત્યાર સુધી રમાયેલી 12 મેચોમાં તેણે 150થી વધુની સ્ટ્રાઇક રેટથી 305 રન બનાવ્યા છે, જેમાં ત્રણ અડધી સદીનો સમાવેશ થાય છે. રોહિત આ સિઝનમાં MI માટે ત્રીજો સૌથી વધુ રન બનાવનાર ખેલાડી છે. તેનાથી આગળ ફક્ત રિયન રિકેલ્ટન (361 રન) અને સૂર્યકુમાર યાદવ (583 રન) છે.
GSTVની એપ્લિકેશન ડાઉનલોડ કરો
રોહિત શર્મા પાસે મોટું કારનામું કરવાની તક છે
હવે, રોહિતની નજર એક મોટા વ્યક્તિગત રેકોર્ડ પર ટકેલી છે. આજે, જ્યારે MI જયપુરમાં પંજાબ કિંગ્સ (PBKS) સામે IPL 2025ની 69મી મેચ રમશે, ત્યારે રોહિત શર્મા પાસે ઈતિહાસ રચવાની સુવર્ણ તક હશે. જો તે આ મેચમાં 67 રન બનાવશે તો તે IPLમાં 7000 રનનો આંકડો પાર કરી લેશે. તે આવું કરનાર બીજો બેટ્સમેન બનશે. અત્યાર સુધી, આ સિદ્ધિ ફક્ત વિરાટ કોહલીએ જ મેળવી છે, જેણે લીગમાં 8000થી વધુ રન બનાવ્યા છે.
આ ઐતિહાસિક સિદ્ધિના ઉંબરે પહોંચેલા રોહિત શર્મા પાસે પણ IPL 2025ના પ્લેઓફ મેચોમાં આ રેકોર્ડ હાંસલ કરવાની તક હશે, કારણ કે MIની ટીમ પહેલાથી જ પ્લેઓફમાં પોતાનું સ્થાન નિશ્ચિત કરી ચૂકી છે.
શિખર ધવન, જે હવે પ્રોફેશનલ ક્રિકેટમાંથી નિવૃત્તિ લઈ ચૂક્યો છે, તે IPLમાં રન બનાવવાના મામલે ત્રીજા સ્થાને છે. આવી સ્થિતિમાં, રોહિત પાસે કોહલી પછી IPLનો સૌથી સફળ બેટ્સમેન બનવાની શાનદાર તક છે.
IPLના ઈતિહાસમાં સૌથી વધુ રન બનાવનાર ખેલાડી
- વિરાટ કોહલી - 8552
- રોહિત શર્મા - 6933
- શિખર ધવન - 6769
- ડેવિડ વોર્નર - 6565
- સુરેશ રૈના - 5528
આ ઉપરાંત, રોહિત શર્મા IPLમાં 300 છગ્ગા ફટકારનાર બીજો ખેલાડી બનવાથી માત્ર 3 છગ્ગા દૂર છે. હિટમેને તેની IPL કારકિર્દીમાં 297 છગ્ગા ફટકાર્યા છે. IPLના ઈતિહાસમાં સૌથી વધુ છગ્ગા ફટકારવાનો રેકોર્ડ ક્રિસ ગેલના નામે છે, જેણે 357 છગ્ગા ફટકાર્યા છે.
IPLમાં સૌથી વધુ છગ્ગા ફટકારનારા બેટ્સમેન
- ક્રિસ ગેલ - 357
- રોહિત શર્મા - 297
- વિરાટ કોહલી - 291
- એમએસ ધોની - 264
- એબી ડી વિલિયર્સ - 251
