Last Update :
02 Jul 2025
ભારતીય ક્રિકેટ ટીમના ફાસ્ટ બોલર મોહમ્મદ સિરાજે ક્રિકેટ ક્ષેત્રની બહાર પણ એક નવી ઇનિંગ શરૂ કરી છે. તેણે પોતાના શહેર હૈદરાબાદના બંજારા હિલ્સ વિસ્તારમાં પોતાનું પહેલું રેસ્ટોરન્ટ ખોલ્યું છે. તેણે આ રેસ્ટોરન્ટનું નામ 'જોહારફા' રાખ્યું છે. આ ભવ્ય રેસ્ટોરન્ટનું ઉદ્ઘાટન 24 જૂને થયું હતું.
GSTVની એપ્લિકેશન ડાઉનલોડ કરો
પરંપરાગત સ્વાદમાં મિશ્રિત સિરાજનો તડકા
જોહારફામાં ઘણા વિવિધ સ્વાદનો આનંદ માણવામા મળશે. આ રેસ્ટોરન્ટમાં મહેમાનોને મુઘલાઈ, પારસી, અરબી અને ચાઇનીઝ વાનગીઓ પીરસવામાં આવશે. સિરાજે કહ્યું, "હૈદરાબાદ શહેરે મને ઘણું આપ્યું છે, હવે હું મારા શહેરને કંઈક પાછું આપવા માંગુ છું. 'જોહારફા' ફક્ત એક રેસ્ટોરન્ટ નહીં, તે એક અનુભવ હશે, જ્યાં લોકોને ઘરનો સ્વાદ અને વાતાવરણ મળશે."
આ રેસ્ટોરન્ટમાં અનુભવી શેફની ટીમ કામ કરશે અને ભોજનની ગુણવત્તા સાથે કોઈ સમાધાન કરવામાં આવશે નહીં. રેસ્ટોરન્ટમાં પરંપરાગત સ્વાદને ખાસ મહત્વ આપવામાં આવ્યું છે. દેશી સ્વાદની સાથે વિદેશી સ્વાદ શોધનારાઓ માટે આ એક ખાસ સ્થાન બની શકે છે.
સિરાજ પહેલા સચિન તેંડુલકર, સૌરવ ગાંગુલી, વિરાટ કોહલી અને ઝહીર ખાન જેવા મોટા ક્રિકેટરો પણ રેસ્ટોરન્ટ વ્યવસાયમાં પગ મૂકી ચૂક્યા છે. હવે સિરાજે પણ પોતાની રેસ્ટોરન્ટ ખોલીને આ ક્લબમાં સ્થાન બનાવ્યું છે.
સિરાજની અત્યાર સુધીની ક્રિકેટ સફર
37 વર્ષીય મોહમ્મદ સિરાજની ક્રિકેટ કારકિર્દી સતત નવી ઊંચાઈઓને સ્પર્શી રહી છે, પરંતુ હવે તેણે તેની વ્યાવસાયિક સફરમાં એક નવો અધ્યાય ઉમેર્યો છે, જે બિઝનેસવનો છે. સિરાજે અત્યાર સુધીમાં ભારત માટે 37 ટેસ્ટ મેચમાં 102 વિકેટ, 44 વનડેમાં 71 વિકેટ અને 16 T20 આંતરરાષ્ટ્રીય મેચમાં 14 વિકેટ લીધી છે. હાલમાં સિરાજ ઇંગ્લેન્ડ પ્રવાસ પર ભારતીય ટીમ સાથે ટેસ્ટ સિરીઝ રમી રહ્યો છે. જસપ્રીત બુમરાહ પછી તેને હાલમાં ભારતીય ટીમના સૌથી અનુભવી ફાસ્ટ બોલરોમાંથી એક માનવામાં આવે છે. જોકે, ક્રિકેટ મેદાન પર પોતાની બોલિંગથી ચાહકોના દિલ જીત્યા બાદ સિરાજ હવે 'જોહરફા' દ્વારા હૈદરાબાદના લોકોનો સ્વાદ જીતવા માંગે છે.
