Last Update :
19 Jun 2025
20 જૂનથી લીડ્સમાં શરૂ થનારી ભારત અને ઈંગ્લેન્ડ વચ્ચેની ટેસ્ટ મેચ પહેલા પ્રેસ કોન્ફરન્સમાં વાઈસ-કેપ્ટન રિષભ પંતે હાજરી આપી હતી. પંતે અમદાવાદમાં થયેલી વિમાન દુર્ઘટના પર દુઃખ વ્યક્ત કર્યું હતું અને કહ્યું હતું કે તે તેના મનમાં રહેશે અને ટીમ તેમના પ્રદર્શનથી દેશવાસીઓને ખુશ કરવાનો પ્રયાસ કરશે. 12 જૂને, અમદાવાદથી લંડન જતું એર ઈન્ડિયાનું વિમાન ટેકઓફની માત્ર 2 મિનિટ પછી ક્રેશ થયું હતું, જેમાં 241 મુસાફરો સહિત ઘણા લોકો મૃત્યુ પામ્યા હતા.
GSTVની એપ્લિકેશન ડાઉનલોડ કરો
પ્રેસ કોન્ફરન્સમાં રિષભ પંતે શું કહ્યું?
બુધવારે પ્રેસ કોન્ફરન્સમાં હાજર રહેલા વાઈસ-કેપ્ટન રિષભ પંતે કહ્યું હતું કે, "અમદાવાદમાં જે કંઈ પણ થયું, તેનાથી આખું ભારત દુઃખી છે. પરંતુ અમે અમારી તરફથી ભારતને ફરીથી ખુશ કરવાનો પ્રયાસ કરી શકીએ છીએ." તેણે વચન આપ્યું હતું કે ટીમ જીતવા માટે બધું જ કરશે.
પંતે કહ્યું, "વિમાન દુર્ઘટનામાં જે કંઈ બન્યું તેના કારણે લોકો ઘણી લાગણીઓમાંથી પસાર થઈ રહ્યા હશે. અમે ભારત માટે અમારું શ્રેષ્ઠ પ્રદર્શન આપવાનો પ્રયત્ન કરીશું, જેથી અમે તેમને ફરીથી ખુશ કરી શકીએ. આ હંમેશા એક વધારાની જવાબદારી છે."
ભારત અને ઈંગ્લેન્ડ વચ્ચેની પહેલી ટેસ્ટ લીડ્સના હેડિંગ્લી ક્રિકેટ ગ્રાઉન્ડ ખાતે રમાશે. 5 મેચની સિરીઝની આ પહેલી ટેસ્ટ 20 જૂનથી શરૂ થશે. પંતે પોતાના નિવેદનમાં વધુમાં કહ્યું, "તમે દેશવાસીઓને હંમેશા ખુશ કરવા માંગો છો, પરંતુ એક ક્રિકેટર તરીકે તે હંમેશા શક્ય નથી. હા, હું મારી તરફથી વચન આપી શકું છું કે અમે અમારા પ્રદર્શનમાં કોઈ કસર નહીં છોડીએ, અમે 200 ટકા આપીશું જેથી અમે દેશવાસીઓને ખુશ કરી શકીએ."
પહેલી ટેસ્ટ માટે ભારતની સંભવિત પ્લેઈંગ ઈલેવન
યશસ્વી જયસ્વાલ, શુભમન ગિલ, કેએલ રાહુલ, સાઈ સુદર્શન, રિષભ પંત, કરુણ નાયર, રવિન્દ્ર જાડેજા, શાર્દુલ ઠાકુર, પ્રસિદ્ધ કૃષ્ણા, જસપ્રીત બુમરાહ, મોહમ્મદ સિરાજ.
મેચનું લાઈવ ટેલિકાસ્ટ અને લાઈવ સ્ટ્રીમિંગ
ભારત અને ઈંગ્લેન્ડ વચ્ચેની પ્રથમ ટેસ્ટ મેચનું ભારતમાં સોની સ્પોર્ટ્સ નેટવર્ક પર લાઈવ ટેલિકાસ્ટ કરવામાં આવશે. લાઈવ સ્ટ્રીમિંગ JioHotstar પર થશે. 20 જૂનથી શરૂ થનારી પ્રથમ ટેસ્ટ મેચમાં ટોસ ભારતીય સમય મુજબ બપોરે 3:00 વાગ્યે થશે. મેચ દરરોજ બપોરે 3:30 વાગ્યે શરૂ થશે.
