Last Update :
25 Mar 2025
ટીમ બદલાઈ, જર્સીનો રંગ બદલાયો અને તેની સાથે રમવાની સ્ટાઇલ પણ નવી દેખાઈ. આજે અમે એવા ખેલાડીઓ વિશે વાત કરી રહ્યા છીએ જેઓ IPL 2025માં પોતાની નવી ટીમ સાથે રમતી વખતે શાનદાર પ્રદર્શન કરી રહ્યા છે. આ એવા ખેલાડીઓ છે જેમની સામે વિરોધી ટીમો લાચાર દેખાઈ હતી, જેમણે એકલા હાથે મેચ જીતી અને પ્લેયર ઓફ ધ મેચ પણ બન્યા. કૃણાલ પંડ્યા, ઈશાન કિશન અને નૂર અહેમદ એવા નામ છે જેઓ IPL 2025ની પહેલી ત્રણ મેચમાં પોતાની નવી ટીમ માટે હીરો સાબિત થયા હતા. આ ત્રણેય ખેલાડીઓ ગઈ સિઝનમાં કોઈ અન્ય ટીમના ભાગ હતા, પરંતુ આ વખતે IPLની 18મી સિઝનમાં, તેઓ RCB, SRH અને CSK માટે જીતનું મોટું કારણ બન્યા છે.
GSTVની એપ્લિકેશન ડાઉનલોડ કરો
LSGથી RCBમાં આવતા જ કૃણાલ પંડ્યા ચમક્યો
IPL 2025ની શરૂઆતની મેચ જ ધમાકેદાર રહી, જેમાં કોલકાતા નાઈટ રાઈડર્સ અને રોયલ ચેલેન્જર્સ બેંગલુરુ એકબીજા સામે ટકરાયા. આ મેચમાં, RCB એ 7 વિકેટથી જીત મેળવી, અને કૃણાલ પંડ્યા આ જીતનો હીરો બન્યો. તેણે KKR સામે 4 ઓવરમાં 29 રન આપીને 3 વિકેટ લઈને પોતાની શાનદાર બોલિંગ સ્કિલ દેખાડી અને ટીમને ભવ્ય જીત અપાવી. ગઈ સિઝન સુધી લખનૌ સુપર જાયન્ટ્સ (LSG) નો ભાગ રહેલો કૃણાલ પંડ્યા આ વખતે RCB સાથે જોડાયો છે. RCB એ તેને 5.75 કરોડ રૂપિયામાં ખરીદ્યો, અને તેણે તેની નવી ટીમ માટે શાનદાર પ્રદર્શન કર્યું અને તેની જીતમાં મુખ્ય ભૂમિકા ભજવી.
MIથી SRHમાં આવતા જ ઈશાન કિશને ધૂમ મચાવી
IPL 2025ની બીજી મેચ રાજસ્થાન રોયલ્સ અને સનરાઈઝર્સ હૈદરાબાદ વચ્ચે રમાઈ હતી, જેમાં SRH એ 44 રનના મોટા માર્જિનથી જીત મેળવી હતી. આ જીતનો હીરો ઈશાન કિશન હતો, જેણે માત્ર 45 બોલમાં શાનદાર સદી ફટકારી હતી. તેને પ્લેયર ઓફ ધ મેચનો એવોર્ડ પણ આપવામાં આવ્યો હતો. IPLમાં ઈશાન કિશનની પહેલી સદી હતી. ગઈ સિઝન સુધી તે મુંબઈ ઈન્ડિયન્સનો ભાગ હતો, પરંતુ આ વખતે SRH માટે રમતી વખતે, તેણે તેની નવી ટીમને મજબૂત શરૂઆત આપી.
ઈશાન કિશન ગઈ સિઝન સુધી મુંબઈ ઈન્ડિયન્સનો ભાગ હતો, પરંતુ IPL 2025ની મેગા ઓક્શનમાં, સનરાઈઝર્સ હૈદરાબાદની માલિક કાવ્યા મારને તેના પર મોટી બોલી લગાવી અને 11.25 કરોડ રૂપિયામાં તેને પોતાની ટીમમાં સામેલ કર્યો.
GTમાંથી CSKમાં આવતા જ નૂર અહેમદે દેખાડ્યો પોતાનો જાદુ
IPL 2025ની ત્રીજી મેચ ચેન્નાઈ સુપર કિંગ્સ અને મુંબઈ ઈન્ડિયન્સ વચ્ચે રમાઈ હતી, જેમાં CSK એ 4 વિકેટથી જીત મેળવી હતી. આ જીતનો સૌથી મોટો હીરો નૂર અહેમદ હતો, જેણે મુંબઈ સામે 4 ઓવરના સ્પેલમાં માત્ર 18 રન આપીને 4 વિકેટ લીધી હતી. નૂર અહેમદે ગઈ સિઝનમાં ગુજરાત ટાઈટન્સમાં IPL ડેબ્યુ કર્યું હતું. જોકે, આ વખતે ચેન્નાઈ સુપર કિંગ્સે તેના પર વિશ્વાસ દર્શાવ્યો અને IPL 2025 માટે તેને 10 કરોડ રૂપિયામાં ખરીદ્યો, અને તેણે તેની નવી ટીમ માટે શાનદાર પ્રદર્શન કર્યું અને જીતમાં મહત્ત્વપૂર્ણ યોગદાન આપ્યું.
