Last Update :
17 Mar 2025
ઈન્ડિયન પ્રીમિયર લીગ (IPL) ની 18મી સિઝનનો 22મી માર્ચથી પ્રારંભ થઈ રહ્યો છે અને તમામ 10 ફ્રેન્ચાઈઝીની ટીમો વિશ્વની હાઈપ્રોફાઈલ T20 લીગ જીતવા માટે તૈયારીઓમાં વ્યસ્ત છે. IPLની ફ્રેન્ચાઈઝીમાં વિદેશી કોચની ભારે બોલબાલા જોવા મળી રહી છે. ટીમના હેડ કોચ અને સપોર્ટ સ્ટાફમાં ઘણા વિદેશના દિગ્ગજ ક્રિકેટરોને જવાબદારી સોંપવામાં આવી છે. IPLની 18મી સિઝનમાં 6 ફ્રેન્ચાઈઝીના હેડ કોચ તરીકે વિદેશના પૂર્વ દિગ્ગજ ખેલાડીઓ છે. જ્યારે 4 ટીમના હેડ કોચ તરીકે ભારતના પૂર્વ ક્રિકેટરો કાર્યરત છે. IPLની 6 ફ્રેન્ચાઈઝી ગત સિઝનના કોચની સાથે જ આ સિઝનમાં ઉતરવાની તૈયારી કરી રહી છે. જ્યારે 4 ફ્રેન્ચાઈઝીએ સફળતાની આશા સાથે નવા કોચને ટીમના માર્ગદર્શનની જવાબદારી સોંપી છે.
GSTVની એપ્લિકેશન ડાઉનલોડ કરો
IPL 2025ની ફ્રેન્ચાઈઝીના હેડ કોચ અને સપોર્ટ સ્ટાફ
ચેન્નાઈ સુપર કિંગ્સ
ન્યુઝીલેન્ડ ટીમના પૂર્વ દિગ્ગજ બેટર અને પૂર્વ કેપ્ટન સ્ટીફન ફ્લેમિંગ ઘણા વર્ષોથી ચેન્નાઈની ટીમના હેડ કોચ તરીકે કાર્યરત છે. IPLની સૌથી સફળ ફ્રેન્ચાઈઝીઓમાં સામેલ ચેન્નાઈ પાંચ વખત ટાઈટલ જીતી ચૂકી છે. ટીમના બેટિંગ કોચ તરીકે અગાઉની જેમ જ માઈકલ હસી છે. પરંતુ બોલિંગ કોચ તરીકે બ્રાવોનું સ્થાન સાઉથ આફ્રિકાના એરિક સિમોન્સે લીધું છે.
કોલકાતા નાઈટ રાઈડર્સ
પૂર્વ ભારતીય ક્રિકેટર અને ઘરઆંગણાના ક્રિકેટના ઘુરંધર કોચ ચંદ્રકાન્ત પંડિતના માર્ગદર્શનમાં ટાઈટલ ડીફેન્ડ કરવા ઉતરશે. કોલકાતાને આ વખતે મેન્ટર ગૌતમ ગંભીરની ખોટ પડશે, જેણે ટીમ ઈન્ડિયાના હેડ કોચની જવાબદારી સંભાળ્યા બાદ મેન્ટરશીપ છોડી દીધી છે. હવે ટીમના મેન્ટર તરીકે ડ્વેન બ્રાવોએ જવાબદારી સંભાળી છે. આસિસ્ટન્ટ કોચ તરીકે ઓટ્ટી ગીબ્સન જોડાયો છે. બોલિંગ કોચ ભારત અરૂણ છે. બેટિંગ કોચ અભિષેક નાયર અને ફિલ્ડિંગ કોચ રાયન ટેન ડોસ્ચેટની ગેરહાજરી હશે કારણ તે બંને ભારતીય ટીમ સાથે જોડાયા છે.
ગુજરાત ટાઈટન્સ
ગુજરાત ટાઈટન્સની આ IPLમાં ચોથી સિઝન છે અને હેડ કોચ તરીકે આશિષ નેહરા યથાવત્ છે. જોકે બેટિંગ કોચ ગેરી કર્સ્ટનનું સ્થાન પાર્થિવ પટેલે લીધું છે. આશીષ કપૂર આ વખતે સ્પિન બોલિંગ કોચ છે, જ્યારે નદીમને ફાસ્ટ બોલિંગ કોચ બનાવાયો છે. મેથ્યૂ વેડ વિકેટકિપિંગ કોચ તરીકે ટીમની સાથે જોડાયો છે. ફિલ્ડિંગ કોચ તરીકે નરેન્દ્ર નેગી યથાવત છે.
દિલ્હી કેપિટલ્સ
પહેલીવાર IPL જીતવા માટે પ્રયાસ કરી રહેલી દિલ્હી કેપિટલ્સની ટીમ આ વખતે નવા કોચના માર્ગદર્શનમાં ઉતરશે. દિલ્હીએ ભારતના પૂર્વ ખેલાડી હેમાંગ બદાણીને હેડ કોચ બનાવ્યો છે. અગાઉ ટીમના હેડ કોચ તરીકે રિકી પોન્ટીંગ જવાબદારી સંભાળતો હતો. ટીમે મેન્ટર તરીકે ઈંગ્લેન્ડના પૂર્વ બેટર કેવિન પીટરસનને પસંદ કર્યો છે. બેટિંગ કોચ પ્રવિણ આમ્રેના સ્થાને આસિસ્ટન્ટ કોચ મેથ્યુ મોટ્ટ આવ્યો છે. જ્યારે બોલિંગ કોચ જેમ્સ હોપનું સ્થાન આ વખતે મુનાફ પટેલે લીઘું છે.
લખનૌ સુપર જાયન્ટ્સ
ઓસ્ટ્રેલિયાના પૂર્વ ઓપનર જસ્ટીન લેંગરે લખનૌના હેડ કોચ તરીકે સ્થાન જાળવ્યું છે. ઝહીર ખાનને મેન્ટર તરીકે કોચિંગ સ્ટાફમાં સમાવાયો છે. બેટિંગ કોચ શ્રીધરન શ્રીરામ અને બોલિંગ કોચ મોર્ની મોર્કેલના સ્થાને ટીમે સાઉથ આફ્રિકાના ધુરંધર લાન્સ ક્લુઝનર અને ભારતના વિજય દહિયાને આસિસ્ટન્ટ કોચ બનાવ્યા છે. જોન્ટી રોડ્ઝ ફિલ્ડિંગ કોચ તરીકે યથાવત છે.
મુંબઈ ઈન્ડિયન્સ
મુંબઈએ સફળતાની તલાશમાં તેના જૂના હેડ કોચ શ્રીલંકાના જયવર્દનેને ફરી પાછો બોલાવ્યો છે. તેણે માર્ક બાઉચરનું સ્થાન લીધું છે. બેટિંગ કોચ તરીકે પોલાર્ડ અને બોલિંગ કોચ તરીકે મલિંગા યથાવત છે. પારસ મહામ્બ્રે પણ બોલિંગ કોચ તરીકે ટીમની સાથે જોડાયો છે.
પંજાબ કિંગ્સ
પ્રિટી ઝિન્ટાની માલિકી હેઠળની પંજાબની ટીમે આ વખતે હેડ કોચ તરીકે રિકી પોન્ટિંગને જવાબદારી સોંપી છે. જેણે દિલ્હી કેપિટલ્સમાંથી વિદાય લીધી હતી. પંજાબનો હેડ કોચ ગત સિઝનમાં ટ્રેવર બાયલીસ હતો. ટીમના કોચિંગ સ્ટાફમાં બેટિંગ કોચ તરીકે બ્રાડ હેડ્ડિન યથાવત છે. જ્યારે સ્પિન કોચ તરીકે સુનિલ જોશી અને ફાસ્ટ બોલિંગ કોચ તરીકે જેમ્પ હોપ્સ જોડાયા છે.
રાજસ્થાન રોયલ્સ
રાજસ્થાન રોયલ્સે ગત સિઝનના હેડ કોચ સંગાકારાને આ વખતે ડાયરેક્ટર ઓફ ક્રિકેટની જવાબદારી સોંપી છે અને ટીમ ઈન્ડિયાના પૂર્વ કોચ દ્રવિડને હેડ કોચ બનાવ્યો છે. બોલિંગ કોચ શેન બોન્ડને આસિસ્ટન્ટ કોચની જવાબદારી મળી છે. જ્યારે બેટિંગ કોચ તરીકે વિક્રમ રાઠૌર અને સ્પિન કોચ તરીકે સાઈરાજ બહુતુલે ટીમની સાથે જોડાયા છે. ટ્રેવર પેની બેટિંગ કોચમાંથી આસિસ્ટન્ટ કોચ બન્યો છે.
રોયલ ચેલેન્જર્સ બેંગલુરુ
ઝિમ્બાબ્વેના પૂર્વ ખેલાડી એન્ડી ફ્લાવરે બેંગલુરુ ટીમના હેડ કોચ તરીકેનું સ્થાન યથાવત રાખ્યું છે. જ્યારે દિનેશ કાર્તિકે બેટિંગ કોચ અને મેન્ટર તરીકેની બેવડી ભૂમિકા ભજવવાની રહેશે. બોલિંગ કોચ એડમ ગ્રીફિથના સ્થાને ફાસ્ટ બોલિંગ કોચ ઓમકાર સાળવી અને સ્પિન કોચ એમ.રંગારાજન જવાબદારી સંભાળી રહ્યા છે.
સનરાઈઝર્સ હૈદરાબાદ
ગત IPLમાં ધૂમ મચાવનારી સનરાઈઝર્સ હૈદરાબાદની ફ્રેન્ચાઈઝના હેડ કોચ તરીકે ન્યુઝીલેન્ડના પૂર્વ સ્પિનર વેટ્ટોરીએ સ્થાન જાળવી રાખ્યું છે. જ્યારે ટીમના બેટિંગ કોચ હેમાંગ બદાણીને દિલ્હીના હેડ કોચની જવાબદારી મળતા તે સ્થાન ખાલી પડ્યું છે. હૈદરાબાદે સિમોન હેલ્મોટને આસિસ્ટન્ટ કોચ બનાવ્યો છે. સ્પિન કોચ તરીકે મુરલીધરનની સાથે ફાસ્ટ બોલિંગ કોચ તરીકે જેમ્સ ફ્રેન્કલીન ટીમની સાથે જોડાયો છે.
