Last Update :
03 Apr 2025
IPL 2025 માં, ગુજરાત ટાઈટન્સની ટીમે રોયલ ચેલેન્જર્સ બેંગલુરુ સામેની મેચમાં 8 વિકેટથી એકતરફી જીત મેળવીને આ સિઝનમાં પોતાની બીજી જીત નોંધાવી છે. સિઝનની પહેલી બે મેચમાં શાનદાર જીત મેળવ્યા બાદ આ મેચમાં ઉતરેલી RCB ટીમને 18મી સિઝનમાં પહેલી હારનો સામનો કરવો પડ્યો છે. મેચમાં પ્રથમ બેટિંગ કરતા, RCB એ લિયમ લિવિંગસ્ટોનની શાનદાર અડધી સદીની ઈનિંગના આધારે 20 ઓવરમાં 169 રન બનાવ્યા હતા. જવાબમાં, ગુજરાત ટાઈટન્સની ટીમે 17.5 ઓવરમાં 2 વિકેટ ગુમાવીને આ ટાર્ગેટ ચેઝ કર્યો અને મેચ જીતી લીધી. ટાર્ગેટ ચેઝ કરતી વખતે, જોસ બટલરે એક મહત્ત્વપૂર્ણ અણનમ અડધી સદીની ઈનિંગ રમી હતી.
GSTVની એપ્લિકેશન ડાઉનલોડ કરો
RCB સામેની મેચમાં 170 રનનો ટાર્ગેટ ચેઝ કરતી વખતે, ગુજરાત ટાઈટન્સને 32 રનના સ્કોર પર શુભમન ગિલના રૂપમાં પહેલો ઝટકો લાગ્યો, જે ફક્ત 14 રન બનાવીને આઉટ થયો હતો. અહીંથી, સાઈ સુદર્શનને જોસ બટલરનો સાથ મળ્યો અને બંનેએ સાથે મળીને પ્રથમ 6 ઓવરમાં ટીમનો સ્કોર 42 રન સુધી પહોંચાડ્યો અને બીજી વિકેટ માટે બંને વચ્ચે 47 બોલમાં 75 રનની પાર્ટનરશિપ જોવા મળી. સાઈ સુદર્શન 36 બોલમાં 49 રન બનાવીને આઉટ થયો હતો, જ્યારે બટલરે અંત સુધી બેટિંગ કરી અને ટીમને જીત તરફ દોરીને પાછો ફર્યો હતો. આ મેચમાં જોસ બટલરે 39 બોલમાં 5 ચોગ્ગા અને 6 છગ્ગાની મદદથી 73 રનની અણનમ ઈનિંગ રમી હતી, આ ઉપરાંત શેરફેન રધરફોર્ડે પણ 18 બોલમાં 30 રનની અણનમ ઈનિંગ રમી હતી.
ગુજરાત માટે મોહમ્મદ સિરાજે મહત્ત્વપૂર્ણ ભૂમિકા ભજવી હતી
આ મેચમાં ગુજરાત ટાઈટન્સ ટીમના બોલરોએ પણ સારું પ્રદર્શન કર્યું, તેઓ રોયલ ચેલેન્જર્સ બેંગલુરુ ટીમની 8 વિકેટ લેવામાં સફળ રહ્યા હતા. RCBએ પાવરપ્લેમાં જ ત્રણ વિકેટ ગુમાવી દીધી હતી, ત્યારબાદ લિયમ લિવિંગસ્ટોને 54 રન બનાવ્યા હતા, જેના કારણે RCB 169 રનના સ્કોર સુધી પહોંચી હતી. લિવિંગસ્ટોન ઉપરાંત, જીતેશ શર્માએ 33 અને ટિમ ડેવિડે 32 રન બનાવ્યા હતા. ગુજરાત તરફથી મોહમ્મદ સિરાજે ત્રણ વિકેટ લીધી જ્યારે સાઈ કિશોરે બે વિકેટ લીધી. આ ઉપરાંત અરશદ ખાન, પ્રસિદ્ધ કૃષ્ણા અને ઈશાંત શર્માએ પણ 1-1 વિકેટ ઝડપી હતી.
