Last Update :
17 May 2025
ભારતના T20 વર્લ્ડ કપ, ચેમ્પિયન્સ ટ્રોફી વિજેતા પૂર્વ T20I અને ટેસ્ટ કેપ્ટન રોહિત શર્મા માટે શુક્રવારનો દિવસ ખાસ હતો. તેની સિદ્ધિઓના સર્વોચ્ચ સન્માનમાં, 'રોહિત શર્મા સ્ટેન્ડ' નું સત્તાવાર રીતે મુંબઈના વાનખેડે સ્ટેડિયમ ખાતે ઉદ્ઘાટન કરવામાં આવ્યું હતું. આ પ્રસંગે રોહિતનો આખો પરિવાર હાજર હતો. આ એ જ મેદાન છે જ્યાંથી રોહિતે ક્રિકેટની દુનિયામાં પોતાનું નામ બનાવવાનું શરૂ કર્યું હતું. જોકે, આ પ્રસંગે એક રમુજી ઘટના બની, જ્યારે રોહિતે તેના નાના ભાઈને ઠપકો આપ્યો.
GSTVની એપ્લિકેશન ડાઉનલોડ કરો
રોહિત શર્માના માનમાં આયોજિત આ સમારોહમાં, તેના માતા-પિતા ગુરુનાથ અને પૂર્ણિમા શર્મા, તેની પત્ની રિતિકા સજદેહ અને ભાઈ વિશાલ પણ સ્ટેડિયમમાં આ ઐતિહાસિક ક્ષણના સાક્ષી બન્યા હતા. દરમિયાન, આ ભાવનાત્મક સમારોહ ટૂંક સમયમાં જ એક હળવાશભરી ક્ષણમાં ફેરવાઈ ગયો, જેનો વીડિયો વાયરલ થયો. રોહિત તેના નાના ભાઈ વિશાલ શર્માને તેની કારમાં પડેલા સ્ક્રેચ માટે ઠપકો આપતો જોવા મળ્યો. રોહિતે હાવભાવ બદલ્યા વિના મજાકમાં પૂછ્યું, "આ શું છે?" અને ગાડી પરના સ્ક્રેચ તરફ ઈશારો કર્યો. આ પ્રશ્નથી વિશાલ થોડો ગભરાયેલો દેખાતો હતો અને ખચકાટ સાથે બોલ્યો, "રિવર્સ લેતા સમયે થયું." આના પર, રોહિતે તરત જ પૂછ્યું, "કોના? તારાથી?" લોકોને આ વીડિયો પસંદ આવી રહ્યો છે. તેઓ રોહિતના તેના ભાઈ સાથેના બોન્ડ પર પ્રતિક્રિયા આપી રહ્યા છે.
રોહિત માટે ખાસ છે વાનખેડે સ્ટેડિયમ
રોહિતના હૃદયમાં વાનખેડે સ્ટેડિયમ એક ખાસ સ્થાન ધરાવે છે, આ તે સ્ટેડિયમ છે જ્યાં 2007માં તેની ક્રિકેટ સફર શરૂ થઈ હતી. સ્ટેન્ડના ઉદ્ઘાટન સમારોહમાં બોલતા, અનુભવી બેટ્સમેને કાર્યક્રમમાં સામેલ દરેકનો આભાર માન્યો અને તેના અંગત તેમજ પ્રોફેશનલ જીવનમાં સ્ટેડિયમના મહત્ત્વ વિશે વાત કરી. તેણે કહ્યું, "આજે જે થઈ રહ્યું છે, મેં ક્યારેય સ્વપ્નમાં પણ નહતું વિચાર્યું. મુંબઈ અને ભારત માટે રમવાનું સ્વપ્ન ધરાવતો બાળક આ બધી બાબતો વિશે નથી વિચારતો. કોઈપણ ખેલાડીની જેમ, મારું પણ એક જ લક્ષ્ય હતું, દેશ માટે મારું શ્રેષ્ઠ આપવાનું. આ સમય દરમિયાન તમે ઘણા બધા સીમાચિહ્નો પાર કરો છો, પરંતુ આટલું સન્માન મેળવવું ખરેખર ખાસ છે."
રોહિત તેના પરિવાર દ્વારા આપવામાં આવેલા બલિદાનને યાદ કરીને ભાવુક થઈ ગયો, જે તેની સફરમાં મહત્ત્વપૂર્ણ રહ્યા છે. તાજેતરમાં ટેસ્ટ ક્રિકેટમાંથી નિવૃત્તિ લેનાર રોહિત શર્મા મુંબઈ ક્રિકેટની કરોડરજ્જુ રહ્યો છે. તેણે ભારતને બે ICC ટાઈટલ (2024માં T20 વર્લ્ડ કપ અને 2025માં ચેમ્પિયન્સ ટ્રોફી) અપાવ્યા છે. 2007માં ભારત માટે ડેબ્યુ કરનાર રોહિતની આંતરરાષ્ટ્રીય કારકિર્દી શાનદાર રહી છે. તે 2007માં T20 વર્લ્ડ કપ વિજેતા ભારતીય ટીમનો પણ ભાગ હતો અને તેણે ભારત માટે 159 T20I, 273 ODI અને 67 ટેસ્ટ રમી છે. ગયા વર્ષે બાર્બાડોસમાં T20 વર્લ્ડ કપમાં ભારતની જીત બાદ તેણે T20Iમાંથી નિવૃત્તિ લીધી હતી.
હાલમાં, રોહિતે IPL અને ભારતની ODI ટીમમાંથી નિવૃત્તિ નથી લીધી. તેની ટીમ મુંબઈ ઈન્ડિયન્સ (MI) ની શાનદાર સફર IPL 2025માં પણ ચાલુ છે, જેમાં રોહિતનું ઘણું યોગદાન છે. રોહિતે અત્યાર સુધીમાં 10 મેચમાં 293 રન બનાવ્યા છે. બીજી તરફ, MI 12 મેચમાં 7 જીત સાથે પોઈન્ટ્સ ટેબલમાં ચોથા સ્થાને છે. IPL 2025 ફરી શરૂ થયા પછી, MIનો પહેલો મુકાબલો 21 મેના રોજ દિલ્હી કેપિટલ્સ (DC) સાથે થશે.
