Last Update :
17 Jun 2025
ભારતે ડિજિટલ પેમેન્ટના ક્ષેત્રમાં વધુ એક મોટું પગલું ભર્યું છે. નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ યુનિફાઇડ પેમેન્ટ્સ ઇન્ટરફેસ (UPI) ને વધુ ઝડપી બનાવવાનો નિર્ણય લીધો છે. સોમવાર, 16 જૂન, 2025થી, UPI દ્વારા ટ્રાન્ઝેક્શનની ગતિ વધુ ઝડપી બનાવાઈ છે. હવે પૈસા મોકલવા, ટ્રાન્ઝેક્શન સ્ટેટસ ચેક કરવા અને રિવર્સલ કરવા જેવા કામો ફક્ત 10થી 15 સેકન્ડમાં પૂર્ણ થશે. પહેલા આ પ્રક્રિયાઓમાં 30 સેકન્ડ જેટલો સમય લાગતો હતો. ડિજિટલ પેમેન્ટને વધુ અનુકૂળ બનાવવા તરફ આ ફેરફાર એક મહત્ત્વપૂર્ણ પગલું છે.
GSTVની એપ્લિકેશન ડાઉનલોડ કરો
નવો ફેરફાર શું છે?
UPI એ એપ્રિલ 2025માં એક પરિપત્ર બહાર પાડ્યો હતો જેમાં તમામ બેંકો અને પેમેન્ટ એપ્લિકેશનોને નવા નિયમો લાગુ કરવાનો નિર્દેશ આપવામાં આવ્યો હતો. આ અંતર્ગત, UPI ટ્રાન્ઝેક્શનની પ્રક્રિયાને ઝડપી બનાવવા માટે રિસ્પોન્સ ટાઈમ ઘટાડવાનું જરૂરી બનાવવામાં આવ્યું હતું. હવે પૈસા મોકલવા, UPI IDની માન્યતા અને ટ્રાન્ઝેક્શનની સ્થિતિ તપાસવા જેવા કામો 10 સેકન્ડમાં પૂર્ણ થશે. અગાઉ, UPI IDની માન્યતામાં 15 સેકન્ડ અને અન્ય પ્રક્રિયાઓમાં 30 સેકન્ડ જેટલો સમય લાગતો હતો.
આ ફેરફાર યુઝર્સને ઝડપી અને વિશ્વસનીય અનુભવ આપશે. NPCIએ પણ ખાતરી કરી છે કે આ ઝડપ ટ્રાન્ઝેક્શનના સફળતા દરને અસર ન કરે. તમામ બેંકો અને પેમેન્ટ સર્વિસ પૂરી પાડનારાઓને આ નવા નિયમ અનુસાર તેમની સિસ્ટમ અપડેટ કરવા માટે 30 જૂન, 2025 સુધીનો સમય આપવામાં આવ્યો છે.
UPIની લોકપ્રિયતામાં ઝડપી વધારો
UPI એ ભારતમાં ડિજિટલ પેમેન્ટને એક નવું પરિમાણ આપ્યું છે. મે 2025માં, UPI દ્વારા 1,868 કરોડ ટ્રાન્ઝેક્શન કરવામાં આવ્યા હતા, જે ગયા વર્ષ કરતા 33 ટકા વધુ છે. આ ટ્રાન્ઝેક્શનની કુલ રકમ 25.14 લાખ કરોડ રૂપિયા હતી, જે 23 ટકાનો વધારો દર્શાવે છે. NPCI એ એ પણ નિર્દેશ આપ્યો છે કે UPI એપ્સ હવે ફક્ત તે વ્યક્તિનું નામ બતાવશે, જેને પૈસા મોકલવામાં આવી રહ્યા છે. આનાથી યુઝર્સને ખાતરી કરવામાં મદદ મળશે કે તેઓ યોગ્ય વ્યક્તિને પૈસા મોકલી રહ્યા છે, જેનાથી ખોટા ટ્રાન્ઝેક્શનનું જોખમ ઘટશે. ડિજિટલ પેમેન્ટ્સને વધુ સુરક્ષિત અને વિશ્વસનીય બનાવવા માટે આ પગલું લેવામાં આવ્યું છે.
NPCI અનુસાર, આ નવો ફેરફાર ફક્ત યુઝર્સને જ સુવિધા નહીં આપે, પરંતુ ભારતની ડિજિટલ પેમેન્ટ સિસ્ટમને પણ મજબૂત બનાવશે. ઝડપ અને સુરક્ષાના આ સંયોજનથી UPIની લોકપ્રિયતામાં વધારો થવાની અપેક્ષા છે.
