JOB / NTPC લિમિટેડે જુનિયર એક્ઝિક્યુટિવની પોસ્ટ માટે ભરતી બહાર પાડી, આ ઉમેદવારો ભરી શકે છે ફોર્મ

નેશનલ થર્મલ પાવર કોર્પોરેશન (NTPC) લિમિટેડે હાલમાં જુનિયર એક્ઝિક્યુટિવ પોસ્ટ્સ માટે અરજીઓ મંગાવી છે. લાયક અને રસ ધરાવતા ઉમેદવારો સત્તાવાર વેબસાઈટની મુલાકાત લઈને અરજી કરી શકે છે. અરજીઓ સબમિટ કરવાની છેલ્લી તારીખ 28મી ઓક્ટોબર છે. આ ભરતી અભિયાન દ્વારા 50 જગ્યાઓ ભરવામાં આવશે. પસંદગી પામેલા ઉમેદવારોની શરૂઆતમાં એક વર્ષ માટે નિમણૂક કરવામાં આવશે. જેમાં તેના પરફોર્મન્સ અને સંસ્થાકીય જરૂરિયાતના આધારે એક્સ્ટેન્શનની શક્યતા છે.

લાયકાત

અરજદારોએ માન્ય સંસ્થામાંથી કૃષિ વિજ્ઞાનમાં B.Sc ડિગ્રી હોવી જોઈએ. કામગીરીમાં બાયોમાસ અને વેસ્ટ મેનેજમેન્ટ, વૈકલ્પિક ઉપયોગોની શોધ અને ખેડૂતો અને લોકોમાં જાગૃતિ લાવવાનો સમાવેશ થાય છે. આ જગ્યાઓ પર અરજી કરવા માટે ઉમેદવારોની ઉંમર 27 વર્ષથી વધુ ન હોવી જોઈએ.

પગાર

જુનિયર એક્ઝિક્યુટિવને 40,000 રૂપિયા માસિક પગાર આપવામાં આવશે. આ ઉપરાંત, કંપની દ્વારા આપવામાં આવેલ ઘર અથવા HRA, પસંદગી પામેલા ઉમેદવાર માટે તેમજ તેના પાર્ટનર, બે બાળકો અને આશ્રિત માતાપિતા માટે તબીબી લાભો પ્રદાન કરવામાં આવશે.

મહત્ત્વપૂર્ણ સૂચનાઓ

ઉમેદવારો પાસે તેમની B.Scડિગ્રીમાં ઓછામાં ઓછા 40 ટકા માર્ક્સ હોવા આવશ્યક છે. જો કે, SC, ST અને PWD ઉમેદવારો માટે કોઈ લઘુત્તમ ગુણની આવશ્યકતા નથી; તેઓ માત્ર પાસિંગ માર્કસ સાથે જ લાયક છે.

ઉંમર અને લાયકાત નક્કી કરવા માટેની કટ-ઓફ તારીખ 28 ઓક્ટોબર છે, જે અરજીઓ સબમિટ કરવાની છેલ્લી તારીખ પણ છે.

SC/ST ઉમેદવારો માટે ઉંમરમાં 5 વર્ષ, OBC ઉમેદવારો માટે 3 વર્ષ અને PWBD ઉમેદવારો માટે 10 વર્ષની છૂટ આપવામાં આવશે. માજી સૈનિકોને સરકારના નિયમો મુજબ વયમાં છૂટછાટ મળશે.

ઉમેદવારોની પસંદગી માટે NTPC ઓનલાઈન સ્ક્રીનીંગ ટેસ્ટનું આયોજન કરી શકે છે અને ત્યારબાદ ઇન્ટરવ્યુ લઈ શકે છે. ખાલી જગ્યાઓની સંખ્યા બદલાઈ શકે છે.

જરૂરિયાતો મુજબ, જુનિયર અધિકારીઓને સ્ટેશન, પ્રોજેક્ટ્સ, જોઈન્ટ વેંચર, પેટાકંપનીઓ અને ઓફિસો સહિત વિવિધ NTPC સ્થાનો પર ફિલ્ડવર્ક સોંપવામાં આવશે.