Last Update :
18 Apr 2025
IPL 2025ની વચ્ચેમાં અચાનક વધુ એક ખેલાડીની એન્ટ્રી થઈ ગઈ છે. આ એન્ટ્રી એમએસ ધોનીની કેપ્ટનશિપ હેઠળની ચેન્નાઈ સુપર કિંગ્સ (CSK) માં થઈ છે, જે આ સિઝનમાં સંઘર્ષ કરી રહી છે. ઋતુરાજ ગાયકવાડ ઈજાગ્રસ્ત થયા બાદ, ચેન્નાઈનો વધુ એક ખેલાડી ઈજાગ્રસ્ત થઈને ટૂર્નામેન્ટમાંથી બહાર થઈ ગયો છે. આ ખેલાડીની જગ્યાએ ચેન્નઈએ સાઉથ આફ્રિકાના વિસ્ફોટક યુવા બેટ્સમેન ડેવાલ્ડ બ્રેવિસ (Dewald Brevis) ને સાઈન કર્યો છે. બ્રેવિસના આગમનથી નબળી દેખાતી CSKની બેટિંગને મજબૂતી મળવાની અપેક્ષા છે.
GSTVની એપ્લિકેશન ડાઉનલોડ કરો
CSK એ શુક્રવાર, 18 એપ્રિલના રોજ સોશિયલ મીડિયા પર એક પોસ્ટ દ્વારા બ્રેવિસ (Dewald Brevis) ને સાથે સાઈન કરવાની જાહેરાત કરી હતી. સાઉથ આફ્રિકાના આ 21 વર્ષીય યુવા બેટિંગ-ઓલરાઉન્ડરને ઈંજરી રિપ્લેસમેન્ટ તરીકે લાવવામાં આવ્યો છે. આ જાહેરાત પહેલા, CSK એ માહિતી આપી હતી કે અનકેપ્ડ ફાસ્ટ બોલર ગુર્જપનીત સિંહ ઈજાને કારણે આખી ટૂર્નામેન્ટમાંથી બહાર થઈ ગયો છે. ગુર્જપનીતને આ સિઝનમાં એક પણ વાર રમવાની તક નથી મળી.
બ્રેવિસ CSKની બેટિંગને મજબૂતી આપશે
હવે ફ્રેન્ચાઇઝીએ ગુર્જપનિતની જગ્યાએ આ આક્રમક રાઈટી બેટ્સમેનનો ટીમમાં સમાવેશ કર્યો છે. ફાસ્ટ બોલરને બદલે બેટ્સમેનને સામેલ કરવા પાછળનું કારણ ચેન્નાઈની નબળી બેટિંગ છે. આ સિઝનમાં, ચેન્નાઈની ટીમ મોટા સ્કોર કરવામાં કે ઝડપી બેટિંગ કરવામાં નિષ્ફળ રહી છે. ખાસ કરીને ટોપ ઓર્ડર આ બાબતમાં સંપૂર્ણપણે નિષ્ફળ ગયો છે. આવી સ્થિતિમાં, CSK એ બ્રેવિસ (Dewald Brevis) નો સમાવેશ કર્યો છે, જે T20 ફોર્મેટમાં પોતાની વિસ્ફોટક બેટિંગ માટે જાણીતો છે. તેનો રેકોર્ડ પણ આનો સાક્ષી છે. આ બેટ્સમેને માત્ર 81 T20 મેચોમાં 123 છગ્ગા ફટકાર્યા છે.
IPL કારકિર્દી
બ્રેવિસ (Dewald Brevis) આ સમયે ઉત્તમ ફોર્મમાં છે. તાજેતરમાં, તેણે ક્રિકેટ સાઉથ આફ્રિકાની ડિવિઝન-1 T20 ટૂર્નામેન્ટની છેલ્લી 6 ઈનિંગ્સમાં એક સદી અને 3 અડધી સદી પણ ફટકારી હતી. પોતાની T20 કારકિર્દીમાં, આ બેટ્સમેને 145ની સ્ટ્રાઈક રેટથી 1787 રન બનાવ્યા છે. આમાં IPLનો પણ સમાવેશ થાય છે, જેમાં તેણે 2 સીઝન રમી હતી. બ્રેવિસે 2022માં મુંબઈ ઈન્ડિયન્સ (MI) માટે ડેબ્યુ કર્યું હતું અને તેની પહેલી સિઝનમાં જ તેણે 7 મેચમાં 142ની સ્ટ્રાઈક રેટથી 161 રન બનાવ્યા હતા. જોકે, 2023માં તેને તક નહતી મળી અને 2024માં, તે 3 મેચમાં ફક્ત 69 રન બનાવી શક્યો હતો. આ પછી, મુંબઈએ તેને રિલીઝ કરી દીધો અને આ વખતે પણ તેને મેગા ઓક્શનમાં કોઈ ખરીદનાર નહતો મળ્યો.
