Last Update :
22 Jun 2025
લીડ્સ ટેસ્ટના ત્રીજા દિવસ પહેલા ભારત અને ઈંગ્લેન્ડના ખેલાડીઓએ ઈંગ્લેન્ડના ભૂતપૂર્વ ફાસ્ટ બોલર ડેવિડ 'સિડ' લોરેન્સને શ્રદ્ધાંજલિ આપવા માટે એક મિનિટનું મૌન પાળ્યું હતું. ત્રીજા દિવસની રમત પહેલા, ઈંગ્લેન્ડ અને વેલ્સ ક્રિકેટ બોર્ડે ડેવિડ 'સિડ' લોરેન્સના મૃત્યુ વિશે માહિતી આપી હતી. ઈંગ્લેન્ડના આ ખેલાડીની આંતરરાષ્ટ્રીય કારકિર્દી ટૂંકી હતી, પરંતુ આ ખેલાડીએ ઘરેલુ ક્રિકેટમાં ખૂબ સારું પ્રદર્શન કર્યું હતું.
GSTVની એપ્લિકેશન ડાઉનલોડ કરો
જ્યારે બંને ટીમો ત્રીજા દિવસની રમત માટે મેદાન પર ઉતરી ત્યારે ખેલાડીઓએ હાથ પર કાળી પટ્ટી બાંધેલી હતી. આ પાછળની માહિતી આપતા, BCCI એ X પર એક તસવીર શેર કરી અને લખ્યું, "બંને ટીમોએ ઈંગ્લેન્ડના ભૂતપૂર્વ ક્રિકેટર ડેવિડ 'સિડ' લોરેન્સને માન આપવા માટે કાળી પટ્ટી પહેરી છે, જેમનું દુઃખદ અવસાન થયું છે. ત્રીજા દિવસની રમત શરૂ થતાં પહેલા એક ક્ષણનું મૌન પાળવામાં આવ્યું હતું." તમને જણાવી દઈએ કે ઈંગ્લેન્ડ અને ગ્લોસ્ટરશાયરના ભૂતપૂર્વ ફાસ્ટ બોલર ડેવિડ વેલેન્ટાઈન લોરેન્સનું 61 વર્ષની વયે મોટર ન્યુરોન રોગ (MND) સામે લડ્યા બાદ અવસાન થયું હતું.
https://twitter.com/BCCI/status/1936728140652675126
ડેવિડ વેલેન્ટાઈન લોરેન્સે કુલ પાંચ ટેસ્ટ મેચ રમી હતી
ડેવિડ લોરેન્સે 1988માં આંતરરાષ્ટ્રીય ક્રિકેટમાં પ્રવેશ કર્યો હતો. તેમણે 1988થી 1992 વચ્ચે પાંચ ટેસ્ટ રમી હતી, જેમાં તેમણે કુલ 18 વિકેટ લીધી હતી. આ ટેસ્ટ દરમિયાન, 1991માં, તેમણે વેસ્ટ ઈન્ડીઝ સામેની મેચમાં 5 વિકેટ પણ લીધી હતી. તે ઈનિંગમાં તેમણે મહાન બેટ્સમેન વિવ રિચાર્ડ્સને આઉટ કર્યા હતા.
આ પછી, 1992માં ન્યુઝીલેન્ડમાં એક ટેસ્ટ મેચ દરમિયાન, તેમને ઘૂંટણની ભયંકર ઈજા થઈ હતી અને ત્યારબાદ તેમની આંતરરાષ્ટ્રીય કારકિર્દીનો દુ:ખદ અંત આવ્યો હતો. આ પછી, 2023માં જાણવા મળ્યું કે તેમને મોટર ન્યુરોન રોગ છે.
ઈંગ્લેન્ડ અને વેલ્સ ક્રિકેટ બોર્ડ (ECB) દ્વારા તેમના મૃત્યુની જાણ કરવામાં આવી હતી. તેમની શ્રદ્ધાંજલિમાં, તેમણે ડેવિડ વેલેન્ટાઈન લોરેન્સને એક અગ્રણી ફાસ્ટ બોલર તરીકે વર્ણવ્યા હતા. જેમની કારકિર્દી અને વ્યક્તિત્વ એ અંગ્રેજી ક્રિકેટ પર અમીટ છાપ છોડી હતી. લોરેન્સ આંતરરાષ્ટ્રીય ક્રિકેટમાં ઈંગ્લેન્ડનું પ્રતિનિધિત્વ કરનાર પ્રથમ બ્રિટિશ મૂળના બ્લેક પ્લેયર હતા અને તેમણે 1988થી 1992 દરમિયાન પાંચ ટેસ્ટ અને એક ODI મેચમાં 22 વિકેટ લીધી હતી.
ECB એ જણાવ્યું, "લોરેન્સ આંતરરાષ્ટ્રીય મંચ પર અણધારી ગતિ, આક્રમકતા અને ઉગ્ર સ્પર્ધાત્મક ભાવના લાવ્યા... તેમનો શ્રેષ્ઠ સમય 1991માં આવ્યો જ્યારે તેમણે ઓવલ ખાતે વેસ્ટ ઈન્ડિઝ સામે પાંચ વિકેટ લીધી."
