Last Update :
26 Jun 2025
Sensex today: જૂન સીરિઝ એક્સપાયરી પર ગુરુવારે શેરબજારમાં તેજી જોવા મળી. સેન્સેક્સ અને નિફ્ટી 50 બંને બેન્ચમાર્ક સૂચકાંકો લીલા નિશાનમાં બંધ થયા. આ ત્યારે બન્યું જ્યારે યુએસ ડોલર નબળો પડ્યો અને મધ્ય પૂર્વમાં તણાવ ઓછો થવા લાગ્યો. વૈશ્વિક બજારોના સકારાત્મક સંકેતો વચ્ચે ગુરુવારે (26 જૂન) ભારતીય શેરબજારો મજબૂત વધારા સાથે લીલા નિશાનમાં બંધ થયા. રોકાણકારોમાં સકારાત્મક ભાવનાઓ વચ્ચે એચડીએફસી બેંક, રિલાયન્સ ઇન્ડસ્ટ્રીઝ અને ભારતી એરટેલ જેવા શેરોમાં ભારે ખરીદીએ સતત ત્રીજા ટ્રેડિંગ સત્રમાં બજારને ઉપર ખેંચી લીધું.
GSTVની એપ્લિકેશન ડાઉનલોડ કરો
30 શેરોવાળો બીએસઈ સેન્સેક્સ આજે લગભગ 100 પોઈન્ટ વધીને ૮૨,૮૮૨.૯૨ પર ખુલ્યો. બજાર ખુલતાની સાથે જ ખરીદી જોવા મળી, જેના કારણે ઈન્ડેક્સમાં વધુ વધારો થયો. ટ્રેડિંગ દરમિયાન, તે ૮૩,૮૧૨ પોઈન્ટ સુધી પહોંચી ગયો હતો. અંતે, તે ૧૦૦૦.૩૬ પોઈન્ટ અથવા 1.21% વધીને 83,755.87 પર બંધ થયો.
એ જ રીતે, નેશનલ સ્ટોક એક્સચેન્જ (એનએસઇ) નો નિફ્ટી-50 પણ લીલા રંગમાં મજબૂત રીતે ખુલ્યો. ટ્રેડિંગ દરમિયાન, તે 25,565.30 પોઈન્ટના ઇન્ટ્રા-ડે ઉચ્ચ સ્તરે પહોંચ્યો. અંતે, તે 304.25 પોઈન્ટ અથવા 1.21% ના મજબૂત વધારા સાથે 25,549 પર બંધ થયો.
ઇન્ટ્રાડેમાં નિફ્ટી 25,500ને પાર કરવામાં સફળ રહ્યો. ઇન્ડેક્સ 9 મહિનાની ઊંચી સપાટીએ પહોંચી ગયો છે. નિફ્ટીના ઉછાળામાં સૌથી મોટો ફાળો હેવીવેઇટ શેરો - એચડીએફસી બેંક, રિલાયન્સ ઇન્ડસ્ટ્રીઝનો હતો. નિફ્ટી બેંક પણ રેકોર્ડ સ્તરે બંધ થયો. એચડીએફસી બેંક અને આઇસીઆઇસીઆઇ બેંકે આ ઇન્ડેક્સમાં સૌથી વધુ ફાળો આપ્યો.
તે જ સમયે, નિફ્ટી મિડકેપ અને સ્મોલકેપ ઇન્ડેક્સ પણ વધારા સાથે બંધ થયા. નિફ્ટી મિડકેપમાં 0.59 ટકા અને નિફ્ટી સ્મોલકેપ ઇન્ડેક્સમાં 0.42 ટકાનો વધારો જોવા મળ્યો. મિડકેપ ઇન્ડેક્સ સતત પાંચમા દિવસે ઊંચા મથાળે બંધ રહ્યો. ક્ષેત્રીય મોરચે, મેટલ, ઓઇલ અને ગેસ, પીએસઈ શેરોમાં ખરીદી જોવા મળી. બેંકિંગ, ઊર્જા અને એફએમસીજી શેરોમાં તેજી જોવા મળી હતી..આ સમયગાળા દરમિયાન, બીએસઇ પર લિસ્ટેડ બધી કંપનીઓનું માર્કેટ કેપ 3.33 લાખ કરોડ રૂપિયા વધીને 457.33 લાખ કરોડ રૂપિયા થયું.
સેક્ટોરલ ઈન્ડેક્સ
જોકે બધા સેક્ટરલ ઇન્ડેક્સમાં વધારો જોવા મળ્યો, પરંતુ નિફ્ટી મીડિયાને સૌથી વધુ નુકસાન થયું અને તે 1.09 ટકા ઘટ્યું. આ પછી, નિફ્ટી રિયલ્ટીમાં 1 ટકા અને નિફ્ટી આઇટીમાં 0.13 ટકાનો ઘટાડો જોવા મળ્યો. સેક્ટરલ ઇન્ડેક્સમાં સૌથી ટોપ પર્ફોર્મર મેટલ ઇન્ડેક્સ રહ્યો. જેમાં 2.31 ટકાનો વધારો જોવા મળ્યો. આ પછી, નિફ્ટી ઓઇલ એન્ડ ગેસમાં 1.86 ટકા, નિફ્ટી ઇન્ફ્રાસ્ટ્રક્ચરમાં 1.63 ટકા, નિફ્ટી ફાઇનાન્શિયલ સર્વિસિસમાં 1.48 ટકા, નિફ્ટી સર્વિસિસ સેક્ટરમાં 1.30 ટકા અને નિફ્ટી બેંકમાં 1.03 ટકાનો વધારો જોવા મળ્યો.
ટોપ ગેનર્સ અને લૂઝર્સ
નિફ્ટી ૫૦ માં સમાવિષ્ટ શેરોમાં, શ્રીરામ ફાઇનાન્સ, જિયો ફાઇનાન્સિયલ સર્વિસીસ, ટાટા સ્ટીલ, ભારતી એરટેલ અને હિન્ડાલ્કો ઇન્ડસ્ટ્રીઝ સૌથી વધુ વધ્યા હતા. આમાં ૨.૪૮ થી ૩.૬૯ ટકાનો વધારો નોંધાયો હતો. બીજી તરફ, ડૉ. રેડ્ડીઝ લેબોરેટરીઝ, ટેક મહિન્દ્રા, વિપ્રો, સ્ટેટ બેંક ઓફ ઈન્ડિયા (એસબીઆઇ) અને હીરો મોટોકોર્પના શેર 0.45 થી 1.31 ટકા સુધી ઘટ્યા હતા.
બેન્ક નિફ્ટીમાં જોરદાર તેજી
વ્યાપક બજારમાં, નિફ્ટી મિડકેપ 100 અને નિફ્ટી સ્મોલકેપ 100 ઇન્ડેક્સ અનુક્રમે 0.59 ટકા અને 0.42 ટકા ઘટીને બંધ થયા. ક્ષેત્રીય મોરચે, બેંક નિફ્ટી 1.13 ટકા ઉછળીને 57,263.45 ની ઇન્ટ્રા-ડે ઊંચી સપાટીએ પહોંચ્યો અને પછી 1.03 ટકાના વધારા સાથે 57,206.70 પર બંધ થયો.
બે દિવસમાં સેન્સેક્સ 2% વધ્યો, નિફ્ટી 500 પોઈન્ટ ઉછળ્યો
બજારમાં ચાલી રહેલી તેજી વચ્ચે, મુખ્ય બેન્ચમાર્ક ઇન્ડેક્સ છેલ્લા બે ટ્રેડિંગ સત્રોમાં 2 ટકાથી વધુ વધ્યો છે.
મંગળવારે સેન્સેક્સ ૮૨,૦૫૫ પર બંધ થયો હતો. જ્યારે આજે તે ૮૩,૭૫૫ પોઈન્ટ પર બંધ થયો હતો. તેવી જ રીતે, નિફ્ટી-૫૦ પણ છેલ્લા બે ટ્રેડિંગ સત્રમાં ૫૦૦ પોઈન્ટથી વધુ ઉછળ્યો છે. મંગળવારે તે ૨૫,૦૪૪.૩૫ પોઈન્ટ પર બંધ થયો હતો. જ્યારે આજે તે ૨૫,૫૪૯ પર બંધ થયો હતો.
આજે ક્યા ક્યા શેરોમાં એક્શન જોવા મળ્યું?
ભારતી એરટેલ અને HDFC બેંક આજે પહેલીવાર પ્રતિ શેર રૂ. 2,000 ને પાર કરવામાં સફળ રહ્યા.આજે નકારાત્મક બ્રોકરેજ નોટ પછી મજબૂત સત્રમાં પણ ડૉ. રેડ્ડીઝ લેબ્સ ઘટાડા સાથે બંધ થયા. આંતરરાષ્ટ્રીય બજારમાં કોપરના ભાવમાં વધારાને કારણે હિંદ કોપરમાં 5%નો વધારો જોવા મળ્યો. મજબૂત માંગની અપેક્ષાએ સિમેન્ટના શેરોમાં ખરીદી વધી. દાલમિયા સિમેન્ટ 5% વધીને બંધ થયો.
આજે ઓઇલ માર્કેટિંગ કંપનીઓના શેર વધ્યા. ત્રણેય સરકારી ઓઇલ માર્કેટિંગ કંપનીઓ આઇઓસૂ, બીપીસીએલ અને એચપીસીએલ માં 3% નો વધારો જોવા મળ્યો. એમસીએક્સમાં આજે સતત બીજા દિવસે વધારો જોવા મળ્યો. આ અઠવાડિયે આ શેરમાં 9% નો વધારો જોવા મળ્યો છે. જોકે, ખાતર અને રિયલ્ટી શેર આજે દબાણ હેઠળ રહ્યા. પ્રેસ્ટિજ એસ્ટેટ્સ અને UPL સૌથી નબળા શેર હતા.
વૈશ્વિક સંકેતો કેવા છે?
વૈશ્વિક મોરચે, ગુરુવારે એશિયા-પેસિફિક બજારો મિશ્ર ખુલ્યા. રોકાણકારોએ ઈરાન-ઇઝરાયલ યુદ્ધવિરામની પ્રગતિ પર નજર રાખી. જાપાનનો નિક્કી ઇન્ડેક્સ 0.98% વધ્યો, જ્યારે ટોપિક્સ ઇન્ડેક્સ 0.48% વધ્યો. દક્ષિણ કોરિયાનો કોસ્પી 0.51% ઘટ્યો અને ઓસ્ટ્રેલિયાનો ASX 200 0.11% ઘટ્યો.
યુએસ બજારો વિશે વાત કરતા, ફેડના ચેરમેન જેરોમ પોવેલે સેનેટ સમક્ષ જુબાની દરમિયાન પુનરોચ્ચાર કર્યો કે જો ફુગાવો કામચલાઉ સાબિત થાય તો વ્યાજ દરમાં ઘટાડો શક્ય છે, જોકે, તેમણે કોઈ સમયમર્યાદા સૂચવી નથી. ટ્રમ્પ વહીવટીતંત્ર ફેડ પર દર ઘટાડવા માટે સતત દબાણ કરી રહ્યું છે. બુધવારે રાત્રે યુએસ બજારોમાં હળવી ચાલ જોવા મળી. S&P 500 ઇન્ડેક્સ થોડો ઘટાડો સાથે 6,092.16 પર બંધ થયો, જ્યારે નાસ્ડેક કમ્પોઝિટ 0.31% ના વધારા સાથે 19,973.55 પર બંધ થયો. તે જ સમયે, ડાઉ જોન્સ 0.25% ના ઘટાડા સાથે 42,982.43 પર બંધ થયો.
હવે રોકાણકારોની નજર અમેરિકાના પ્રથમ ક્વાર્ટરના જીડીપી ભાવ સૂચકાંકના અંતિમ ડેટા અને સાપ્તાહિક રોજગારીના દાવાઓના ડેટા પર છે, જે બજારની આગામી ચાલને પ્રભાવિત કરી શકે છે.
વૈશ્વિક અનિશ્ચિચતાઓ હોવા છતાં ભારતનું અર્થતંત્ર મજબૂતઃ આરબીઆઇ
રિઝર્વ બેંક ઓફ ઈન્ડિયા (આરબીઆઇ) ના તાજેતરના 'સ્ટેટ ઓફ ધ ઈકોનોમી' રિપોર્ટ અનુસાર, વૈશ્વિક અનિશ્ચિતતાઓ છતાં ભારતનું અર્થતંત્ર મજબૂત રહ્યું છે. રિપોર્ટમાં જણાવાયું છે કે ફેબ્રુઆરીથી રેપો રેટમાં 100 બેસિસ પોઈન્ટનો ઘટાડો કરવામાં આવ્યો છે, જેના કારણે તે ઘટીને 5.5% પર આવી ગયું છે. આ ઉપરાંત, 6 સપ્ટેમ્બરથી તબક્કાવાર રીતે સીઆરઆર માં 100 bps ઘટાડો કરવાથી બજારમાં લગભગ ₹2.5 લાખ કરોડ રોકડ આવશે. આનાથી ભંડોળનો ખર્ચ ઘટશે અને લોન વિતરણ ઝડપી બનશે.
