Last Update :
24 Apr 2025
મુંબઈ એવું શહેર જ્યાં સપના સાકાર થાય છે. આ શહેરના એક મહારાષ્ટ્રીયન બ્રાહ્મણ પરિવારમાં 24 એપ્રિલ 1973ના રોજ એક છોકરાનો જન્મ થયો. 52 વર્ષ પહેલાં જન્મેલા આ સરળ વાંકડિયા વાળવાળા છોકરાને આજે 'ક્રિકેટનો ભગવાન' કહેવામાં આવે છે. આજે આખી દુનિયા સચિન તેંડુલકરને જન્મદિવસની શુભેચ્છાઓ આપી રહી છે.
1989માં જ્યારે સચિને માત્ર 16 વર્ષની ઉંમરે પાકિસ્તાન સામે આંતરરાષ્ટ્રીય ક્રિકેટમાં ડેબ્યૂ કર્યું હતું, ત્યારે કોઈએ કલ્પના પણ નહોતી કરી કે આ નાનો છોકરો એક દિવસ રમતમાં સૌથી ઊંચા પદ પર પહોંચશે. સર્વકાલીન મહાન બેટ્સમેનોમાં ગણાતા સચિન 100 આંતરરાષ્ટ્રીય સદી ફટકારનાર વિશ્વનો એકમાત્ર ખેલાડી છે.
GSTVની એપ્લિકેશન ડાઉનલોડ કરો
સચિનનું નામ પ્રખ્યાત સંગીતકાર સચિન દેવ બર્મન પરથી રાખવામાં આવ્યું છે. સચિનના પિતા રમેશ તેંડુલકર બર્મનના મોટા ચાહક હતા. તમને જાણીને નવાઈ લાગશે કે મહાન બેટ્સમેન સચિન ફાસ્ટ બોલર બનવા માંગતો હતો. આ ઉંમરે પણ ખૂબ જ ફિટ દેખાતા સચિનને ખાવાનો ખૂબ શોખ છે.
સચિનના લગ્ન કરોડપતિ ગુજરાતી ઉદ્યોગપતિ આનંદ મહેતા અને બ્રિટિશ સમાજસેવક એનાબેલ મહેતાની પુત્રી અંજલિ સાથે થયા હતા, જે તેમનાથી છ વર્ષ મોટી હતી. બંનેએ પોતાના અફેરને છુપાવવા માટે ઘણું ખોટું બોલ્યા. 1994માં ન્યુઝીલેન્ડમાં ગુપ્ત રીતે સગાઈ કર્યા પછી તેમણે દુનિયાને તેના વિશે જણાવ્યું. અંજલિ એક બાળરોગ નિષ્ણાત છે. પાંચ વર્ષ સુધી એકબીજાને ડેટ કર્યા પછી આ દંપતીએ લગ્ન કર્યા હતાં.
સચિન તેંડુલકરે ક્રિકેટમાં ભારતને ઘણી મોટી સિદ્ધિઓ આપી. તેમની મહેનત, સમર્પણ અને સફળતાને ધ્યાનમાં રાખીને સરકારે તેમને ભારત રત્ન, પદ્મ વિભૂષણ, રાજીવ ગાંધી ખેલ રત્ન જેવા સર્વોચ્ચ સન્માનોથી નવાજ્યા છે. ધોનીની કેપ્ટનશીપ હેઠળ 2011માં ODI વર્લ્ડ કપ જીતનારી ટીમમાં સચિનનું મહત્ત્વનું યોગદાન હતું. નિવૃત્તિ લીધાને 12 વર્ષ થઈ ગયા હોવા છતાં તેઓ હજુ પણ લાખો લોકોના હૃદયમાં રાજ કરે છે.
